کاروار:18؍جنوری (ایس او نیوز) انکولہ۔ ہبلی ریلوے لائن منصوبہ، سرحد علاقہ کاروار میں صنعتوں کا قیام سمیت مختلف مانگوں کو لے کر لندن برج پر قومی شاہراہ کو بند کرتے ہوئے احتجاج کی تیاری میں مصروف کنڑا چلولی واٹال پارٹی کے واٹال ناگراج سمیت 21جہدکاروں کو پولس نے گرفتار کرنے کے بعد رہاکردیا۔

واٹال پارٹی کے ضلعی صدر راگھو نائک کی قیادت میں اعلان کئے گئے احتجاج کو مختلف تنظیموں ، اداروں اور کچھ سیاسی پارٹیوں کے لیڈران کی بھی  حمایت حاصل تھی اور باقاعدہ احتجاج میں شریک ہوئے تھے۔ بے روزگاری کے مسئلہ سے پریشان کاروار جیسے سرحدی علاقے میں نوجوانوں کو روزگار فراہم کرنے والی صنعتوں کا قیام ہو۔ یہاں موجود سی برڈ، کئیگا جیسے منصوبہ جات میں مقامی لوگوں کو روزگار میں ریزرویشن دیں۔ کئی دہوں سے دھول چاٹنے والے انکولہ۔ ہبلی ریلوے لائن منصوبے کو جاری کرنے جیسے مختلف مطالبات کو لےکر حکومت کا دھیان راغب کرنے یہ احتجاج منعقد کیاگیا تھا۔

لندن برج کے قریب 2منٹ تک  قومی شاہراہ بند کی گئی ۔ لیکن سواریوں کی گنجانی دیکھتے ہوئے پولس نے احتجاجیوں کواپنی تحویل میں لیا۔ واٹال ناگراج، راگھو نائک، انکولہ کے رمانند نائک، ہالکی طبقہ کے ضلعی صدر ہنومنت گوڈا، جے ڈی ایس لیڈر موہنی نائک، خلیل اللہ خان، آر جی نائک ، خیرون النساء شیخ، شبیر شیخ، رکمنی گوڈا، سبھاش وڈر سمیت کئی لیڈران احتجاج میں شریک تھے۔ ان میں اہم 21لیڈران کو پولس اپنی تحویل میں لے کر دئودنا ہال لے جاکر تھوڑی دیر کے بعد رہا کیا۔ڈی وائی ایس پی شنکر ماریہال کی قیادت میں پولس سکیورٹی انتظامات کئے گئے تھے۔