کاروار11؍جنوری (ایس او نیوز) اُترکنڑا کے رکن پارلیمان آننت کمار ہیگڈے کا پتہ لگانے اور اُس کو گرفتار کرنے کے لئے پولس کی تین ٹیمیں تشکیل دی گئی ہیں جس میں ایک ٹیم سرسی میں کام کرے گی ، دوسری ٹیم بنگلور اور تیسری ٹیم ضلع کے دیگر علاقہ میں رکھی گئی ہے۔ اس بات کی جانکاری آج بدھ کو ضلع کے نئے ایس پی وسنت رائو پاٹل نے دی۔ اخبارنویسوں سے گفتگو کرتے ہوئے انہوں نے بتایا کہ آننت کمار ہیگڈے نے چند روز قبل سرسی کے ایک اسپتال میں دو ڈاکٹروں اور ایک اہلکار پر جس طرح حملہ کیا تھا، وہ پوری غنڈہ گردی اسپتال کے سی سی ٹی وی کیمرے میں قید ہوچکی ہے۔ ہم نے اُس کلپ کی بھی لیباریٹری کے ذریعے جانچ کروارہے ہیں، جبکہ پولس کی ایک ٹیم نے زخمی ڈاکٹروں سے بھی ملاقات کی ہے۔ ایس پی نے بتایا کہ ایم پی آننت کمار ہیگڈے کو نوٹس جاری کی جاچکی ہے، جس کا اُنہوں نے کوئی جواب نہیں دیا ہے۔ اب اُس کی گرفتاری کے لئے تین ٹیمیں ترتیب دی گئی ہے۔ ایس پی کے مطابق آننت کمار ہیگڈے سرسی میں موجود نہیں ہیں، اور اب وہ کہاں ہے، اُس کا پتہ لگایاجارہا ہے۔ ایس پی نے یہ بھی بتایا کہ ہر ٹیم کو الگ الگ کام سونپا گیا ہے ۔ سرسی میں موجود پولس ٹیم کی قیادت سرسی ڈی وائی ایس پی کو سونپی گئی ہے۔
خیال رہے کہ ایس پی وسنت رائو پاٹل کل منگل کو کاروار پہنچ کر ایس پی کا چارج سنبھالا تھا اور پہلی ہی فرصت میں ویسٹرن رینج آئی جی پی سے ملنے مینگلور گئے تھے ، اُن سے صلاح و مشورہ کرنے کے بعد آج وہ کاروار کے اخبارنویسوں سے گفتگو کررہے تھے۔