آئی این ایکس میڈیا کیس:کارتی کو دہلی ہائی کورٹ سے ملی ضمانت
نئی دہلی ،23؍ مارچ (ایس او نیوز؍آئی این ایس انڈیا) دہلی ہائی کورٹ نے آئی این ایکس میڈیا سے متعلق منی لانڈرنگ معاملہ میں کارتی چدمبرم کو مشروط ضمانت پر رہا کرنے کا آج آرڈر دیا ہے۔ جسٹس ایس پی گرگ نے کارتی کے وکیل کی دلیلیں سننے کے بعد مشروط ضمانت کا حکم دیا۔ کارتی 12 مارچ سے عدالتی حراست میں تھے۔ اس سے پہلے کارتی کے وکیل نے یہ کہتے ہوئے اپنے موکل کو ضمانت پر رہا کرنے کی درخواست کی تھی کہ اب اس کو جیل میں رکھنے کا کوئی جواز نہیں ہے۔ کورٹ نے کارتی کو گواہوں کو متاثر نہ کرنے، ملک نہ چھوڑنے اور اپنے بینک اکاؤنٹ بند نہ کرنے کی ہدایت دی ہے۔مرکزی تفتیشی بیورو (سی بی آئی) نے کارتی کو 28 فروری کو لندن سے لوٹتے وقت چنئی ہوائی اڈے پر حراست میں لے لیا تھا اور پوچھ گچھ کے بعد گرفتار کر لیا تھا۔ کارتی کو سی بی آئی دہلی لے کر آئی تھی۔ قریب 13 دنوں تک سی بی آئی کی حراست میں رکھنے کے بعد کارتی کو گذشتہ 12 مارچ کو عدالتی حراست میں بھیج دیا گیا تھا۔کارتی کے خلاف الزام ہے کہ انہوں نے پیٹر مکھرجی اور اندرانی مکھرجی کی ملکیت والی کمپنی آئی این ایکس میڈیا میں 350 کروڑ روپیے کی سرمایہ کاری کے لئے فارن انوسٹمنٹ پرموشن بورڈ(ایف آئی پی بی)سے منظوری دلانے میں اہم کردار ادا کیا تھا اور اس کے بدلہ میں ان کو ساڑھے تین کروڑ روپیے ملے تھے۔ اس وقت ان کے والد پی چدمبرم مرکزی وزیر خزانہ تھے۔