کولمبو،19/مارچ(ایس او نیوز؍ایجنسی) دنیش کارتھک نے آخری بال پر چھکا لگا کر بنگلہ دیش کے خلاف ہندوستان کو چار وکٹوں سے شاندار جیت دلائی، جس کے ساتھ ہی   نداہاس ٹی ٹوئنٹی کرکٹ ٹرائی سیریز کا  ٹائٹل ہندوستان جیتنے میں کامیاب ہوگیا۔

ٹاس جیت کر فیلڈنگ  کا فیصلہ کرنے والی ہندوستانی ٹیم نے تمیم اقبال 15اور لیٹن داس 11کے بعد سومیا سرکار ایک اور مشفق الرحیم کو 9رنز پر پویلین کی راہ دکھا کر 68رنز پر چار وکٹیں گرا دی تھیں مگر صابر رحمن نے 21رنز بنانے والے محمود اﷲ کے ساتھ اسکور کو 104تک پہنچا دیا۔نصف سنچری کا مرحلہ پار کرنے والے صابر رحمن نے اپنی وکٹ جیدیو انڑکت کو تھمائی تو ان کے سات چوکے اور چار چھکوں سمیت 77رنز مجموعی اسکور کو آٹھ وکٹوں پر 166رنز تک پہنچا چکے تھے جبکہ مہدی حسن میراز نے بھی ناقابل شکست 19رنز بنائے ۔ہندوستان کی جانب سے یزویندر چاہل نے تین اور جیدیو انڑکت نے دو کھلاڑیوں کو پویلین کی راہ دکھائی۔

ہندوستان  کی جوابی اننگز میں کپتان روہیت شرما نے شیکھر دھون کے دس اور سریش رائنا کے صفر پر ساتھ چھوڑ جانے کے باوجود 35بالز پر ففٹی مکمل کی اور لوکیش راہول کے ساتھ نصف سنچری شراکت قائم کرکے کھیل کو سنبھال لیا مگر لوکیش راہول 24 او ر روہیت شرما چار چوکوں اور تین چھکوں سمیت 56رنز پر ہمت ہار گئے تو 14اوورز میں 104رنز پر چار وکٹیں گر چکی تھیں۔منیش پانڈے نے تیزی سے 28رنز بنائے مگر دو اوورس  میں 34رنز درکار تھے تو دنیش کارتھک نے دو وکٹیں لینے والے روبیل حسین کو دو چوکے اور دو چھکے جڑ دیئے اور جب دو بالز پر پانچ رنز باقی تھے تو وجے شنکر 17رنز پر چلتے بنے ، اس کے ساتھ ہی اننگز کی آخری گیند پر ہندوستان کو جیت کے لئے پانچ رن درکار تھے، اور سامنے دنیش کارتھک کھڑے تھے۔ سنسنی خیز کھیل کے اس موڑ پر  سومیا سرکار نے جیسے ہی گیند  دنیش کارتھک کو پھینکی، کارتھک نے بلہ گھمادیا جس کے ساتھ گیند ہوا میں اُڑ کر بائونڈری لائن کے باہر جاگری، جس کے ساتھ ہی ہندوستان نے سنسنی خیز طور پر میچ جیت لیا۔ کارتھک نے دو چوکوں اور تین چھکوں کی مدد سے ناقابل شکست 29رنز محض آٹھ بالز پربنائے ۔