اب کرنی سینا کا پی ایم مودی پر وار ،پوچھا پدماوت پر خاموش کیوں؟
جے پور،28؍جنوری (ایس او نیوز؍آئی این ایس انڈیا)بالی وڈ فلم پدماوت 25جنوری کو گرچہ ریلیز ہو گئی ہو، لیکن کرنی سینا ابھی تک اُس معاملے کو لے کر خاموش نہیں ہوئی ہے۔یہاں تک کہ اب کرنی سینا نے وزیر اعظم نریندر مودی سے ان کی خاموشی پر سوال اٹھایا ہے۔
اتوار کو پریس کانفرنس کرکے کرنی سینا نے فلم پدماوت پر پی ایم مودی کی خاموشی کو لے کر سوال اٹھائے۔جے پور میں پریس کانفرنس کے دوران کرنی سینا کے نمائندوں نے فلم پدماوت کی مخالفت کرنے والی ریاستی حکومتوں کا شکریہ ادا کیا۔ وہیں دوسری طرف کرنی سینا نے وزیر اعظم مودی سے سوال کیا کہ وہ اس معاملے پر خاموش کیوں ہیں۔کیوں پی ایم کچھ نہیں بول رہے ہیں؟
واضح رہے کہ فلم پدماوت کو راجپوت سماج کے خلاف بتاتے ہوئے کئی ریاستوں میں اس کو ریلیزنہیں کیا گیا ہے۔تاہم سپریم کورٹ نے تمام ریاستوں کو 25جنوری کو فلم کی ریلیزکا حکم دیا تھا۔باوجود اس کے راجستھان، مدھیہ پردیش اور گجرات میں یہ فلم ریلیز نہیں ہوئی۔وہیں دوسرے صوبوں کے کئی علاقوں میں کرنی سینااور فلم کی مخالفت میں اترے لوگوں نے جم کر ہنگامہ کیا۔جس کے بعد اب کرنی سینانے ان سبھی ریاستی حکومتوں کا شکریہ ادا کیا ہے۔لیکن پی ایم مودی نے اس پورے مسئلے پر کوئی رد عمل نہیں دیا ہے، جس پر کرنی سینانے سوال اٹھائے ہیں۔کرنی سینانے راجپوت رہنما سورج پال امو کو رہا کئے جانے کی بھی مانگ کی۔گرگرام میں پھیلی بدامنی اور تشدد کے الزام میں گرفتار کئے گئے ہریانہ کے رہنما سورج پال فی الحال جیل میں بند ہیں۔کرنی سینانے مطالبہ کیا ہے، انہیں جلد رہا کیا جائے۔
پدماوت کے خلاف غصہ اب بھیٹھنڈا نہیں ہوا ہے، اُدھر مہاراشٹر میں فلم پدماوت کی مخالفت میں تھیٹر کے باہر نامعلوم افراد کی جانب سے پٹرول بم پھینکے جانے کی اطلاع موصول ہوئی ہے، تاہم اس سے کسی قسم کے نقصان کی خبر نہیں ہے۔