عدالت کے خلاف کرنی سینا،ہٹ دھرمی جاری، پرسون جوشی کو بری طرح پیٹنے کی دی دھمکی
نئی دہلی،20؍جنوری (ایس او نیوز؍آئی این ایس انڈیا) عدالت کی کلین چٹ کے باوجودکرنی سیناکی ہٹ دھرمی اوراشتعال انگیزدھمکیاں جاری ہیں لیکن کوئی اینکر،بی جے پی ترجمان اوردیش بھکتی کے دعوے کرنے والے عدالت کے خلاف جانے پراسے دیش دروہ اورباغی کاتمغہ دینے کوتیارنہیں ہے ۔سنجے لیلا بھنسالی کی فلم پدماوت کے خلاف اپنی کھلی بغاوت جاری رکھتے ہوئے راجپوت کرنی سینا نے سینسر بورڈ کے چیئرمین پرسون جوشی کو جے پور جشن ادب کے دوران جے پور نہیں آنے کی دھمکی دی ہے۔فوج نے دھمکی دی ہے کہ اگر وہ جے پور آئے تو بری طرح پیٹے جائیں گے۔کرنی سیناکے صدر سکھ دیو سنگھ گوگامیدی نے ایک ویڈیو پیغام کے ذریعے کہا کہ فلم کو ریلیز کرنے والوں اور فلم کی حمایت میں کچھ بھی بولنے والوں کو جے پور میں داخل نہیں ہونے دیا جائے گا۔انہوں نے کہا کہ فلم کا نام پدماوتی سے پدماوت کرنے سے وہ لوگ مطمئن نہیں ہیں۔وہ فلم پر مکمل پابندی چاہتے ہیں۔انہوں نے وزیر اعظم نریندر مودی سے اس معاملے میں مداخلت کی اپیل کرتے ہوئے ان سے اس فلم پر پابندی لگانے کی اپیل کی۔انہوں نے کہا کہ مرکزی فلم سرٹیفیکیشن بورڈ (سی بی ایف سی) مرکزی حکومت کے تحت آتا ہے، لہٰذا فلم پر پابندی لگانے کے لئے حکومت کو کارروائی کرنی چاہیے۔انہوں نے شکایت کرتے ہوئے کہاکہ بھنسالی نے وعدہ کیا تھا کہ فلم بننے کے بعد سب سے پہلے لوکیندر سنگھ کلوی (کرنی سیناکے رہنما) اور تنظیم کے دیگر ارکان کو دکھائی جائے گی۔لیکن انہوں نے فلم کا ٹریلر ریلیز کر دیا اور گھومر گانا انہیں بغیر دکھائے جاری کر دیا یہ بہت غلط ہے۔انہوں نے الزام لگایا کہ حکومت ہندوتو اور مندرکی بات صرف ووٹ حاصل کرنے کے لئے کرتی ہے۔کرنی سیناکے ترجمان وجیندر سنگھ نے کہا کہ جے پور میں پرسون جوشی کا استقبال بھی ویسا ہی ہو گا جیسا سنجے لیلا بھنسالی کا کیا گیا تھا۔انہیں شہر میں آنے کی اجازت نہیں دی جائے گی۔بھنسالی کو تھپڑ پڑا تھا، لیکن جوشی کو بری طرح پیٹا جائے گا۔انہوں نے کہا کہ فلم کی ریلیز کے خلاف اتر پردیش میں قومی ہائی وے نمبر 3 کو خلل پیدا کردیا ہے۔ کرنی سینا25 جنوری کو فلم ریلیز ہونے پر ہندوستان بند کا اعلان کرے گی۔لوکیندر سنگھ کلوی اس دن ہندوستان بند کو متأثر کن بنانے کے لئے ممبئی میں موجود رہیں گے۔