جئے نگر اسمبلی حلقہ میں معتکفین کو ووٹ ڈالنے کی اجازت
بنگلورو ،8؍ جون(ایس او نیوز) جئے نگر اسمبلی حلقہ میں بروز پیر 11؍جون صبح 7؍ بجے تا شام 6؍ بجے پولنگ ہوگی ۔ اس حلقہ کے بی جے پی اُمید وار بی این وجئے کمار کے انتقال کی وجہ سے اس حلقہ کا الیکشن ملتوی کردیاگیا تھا۔ بی جے پی نے وجئے کمار ہی کے بھائی بی این پرلہاد کو کانگریس اُمیدوار سومیا آر کے خلاف میدان میں اتاراہے۔ اس حلقہ میں کل شام 6؍ بجے انتخابی مہم ختم ہوجائے گی ۔ کانگریس اُمیدوار سومیا آر کو ایک فائدہ یہ ہے کہ وزیراعلیٰ ایچ ڈی کمار سوامی کی ہدایت پراس حلقہ سے جے ڈی ایس اُمیدوار کالے گوڈا سومیا آر کے حق میں مقابلہ سے سبکدوش ہوکر اب کانگریس اُمید وار سومیا کے ساتھ مہم چلا رہے ہیں ۔11؍ جون کو شب قدر ہے اور اس حلقہ میں آنے والے تقریباً 45؍ مساجد میں تقریباً ڈھائی ہزار مسلمان بھائی مختلف مساجد میں دس دنوں کے اعتکاف میں بیٹھ گئے ہیں۔ ان کے رائے دہی کے استعمال کرنے سے متعلق دارالعلوم دیوبند سے فتویٰ منگوایا گیا ہے جس کا آج اکثر مساجد میں خطبہ جمعہ کے دوران اعلان بھی کیاگیا ہے۔ ووٹ ڈالنا شرعی حق ہے اس لئے معتکفین کو بھی اس دن اپنے ووٹ کا ضرور استعمال کرنا چاہئے۔ اس دن معتکفین صرف ووٹ ڈالنے کی نیت کرتے ہوئے متعلقہ مسجد سے سیدھے اپنے متعلقہ پولنگ بوتھ پہنچ کر اپنا ووٹ ڈالنے کے بعد واپس سیدھے مسجد آکر اعتکاف میں بیٹھ جائیں تو یہ درست ہے۔