بنگلورو،31؍مئی(ایس او نیوز) کرناٹک کے چبل پور سے تعلق رکھنے والی ایک ضعیف خاتون اس وقت سرخیوں میں آگئی جب اس نے دہلی کے کرناٹک بھون میں کرناٹک کے وزیراعلی سدارامیا سے ملاقات کی۔ یہ ملاقات جو دو دن پہلے ہوئی کے دوران اس ضعیف خاتون نے اسے الاٹ متنازعہ اراضی کے حل کی خواہش کی ۔اطلاعات کے مطابق یہ خاتون وزیراعظم سے ملاقات کیلئے دہلی آئی تھی تاہم قسمت سے اس کی ملاقات سدارامیا سے ہوگئی جو کرناٹک پردیش کانگریس کمیٹی کے اگلے صدر کے سلسلہ میں تبادلہ خیال کیلئے پارٹی ہائی کمان سے ملاقات کیلئے دہلی آئے ہوئے تھے ۔سدارامیا نے اس خاتو ن کے مسئلہ کی بغورسماعت کی۔منیما نامی خاتون کی گاوں کی خواتین نے اسے مشورہ دیا کہ بنگلورو میں سدارامیا سے ملاقات ناممکن ہے کیوں کہ وہ مصروف شخص ہیں ۔ اس کا بہتر متبادل دہلی میں وزیراعظم مودی سے ملاقات ہے ۔منیما نے کہا کہ دہلی کی منزل تک جانے کے لئے کئی افراد نے اس کی رہنمائی کی۔ بیشتر افراد نے اسے دہلی پہنچانے میں مدد کی اور بالآخر وہ کرناٹک بھون پہنچی جہاں کرناٹک بھون کے اسٹاف نے اسے غذا کی پیشکش کی اور استقبالیہ کے علاقہ میں سونے کی اجازت دی۔پیر کی صبح جب سدارامیا سے کہا گیا کہ ایک مایوس ضعیف خاتون ان سے ملاقات کی منتظر ہے تو سدارامیا نے فوری اس خاتون سے ملاقات کی ۔ منیما نے سدارامیا سے کہا کہ اسے متبادل اراضی فراہم کی جائے کیوں کہ اسے جو اراضی منظور کی گئی ہے وہ متنازعہ ہے ۔سدارامیا نے اس خاتون کو یقین دہانی کروائی کہ وہ اس مسئلہ پر غور کریں گے ۔ سدارامیا نے اس خاتون کو متبادل اراضی الاٹ کرنے ڈسٹرکٹ ڈپٹی کمشنر سے بھی بات کی ۔ سدارامیا نے اس خاتون کے لئے غذا اور قیام کے انتظامات کئے اور اس کی واپسی کے اخراجات کے لئے رقم بھی دی۔