ایم ایل اے چوری کرنے میں بی جے پی کو مہارت حاصل ہے: کانگریس
نئی دہلی ،21؍مئی ( ایس او نیوز؍آئی این ایس انڈیا ) کرناٹک انتخابات کے بعد آج امت شاہ نے کانگریس پر حملہ کیاتھا؛لیکن اب کانگریس نے جوابی حملہ کرکیاسراسیمگی پھیلادی ہے۔ کانگریس لیڈر آنند شرما نے کہا کہ مجھے لگا تھا کہ امت شاہ آج معافی مانگیں گے، یہ اتنی موٹی چمڑی کے ہیں کہ انہیں کوئی ندامت نہیں ہے۔ اگر شرمندگی ہوتی تو کرناٹک کے عوام سے معافی مانگتے۔آنند شرما نے کہا کہ بی جے پی کو ممبران اسمبلی کو خریدنے اور چوری کرنے میں مہارت تامہ حاصل ہے۔ انہوں نے یہ بھی کہاکہ ممبران اسمبلی کے اہل خانہ کو ایجنسیاں اٹھا کر لے گئیں۔ کانگریس جے ڈی ایس نے اپنے ممبران اسمبلی کو بچانے کے لئے جہاں رکھا تھا وہاں سے سیکورٹی ہٹا لی گئی۔ ڈی جی سی اے نے کانگریس۔ جے ڈی ایس اتحادکے ممبران اسمبلی کے طیارہ کو پرواز کی اجازت نہیں دی۔نند شرما نے کہا کہ امت شاہ کو شاید آئین کی معلومات نہیں، اگر معلومات بھی ہو تو قرین قیاس ہے کہ وہ آئین کو تسلیم نہیں کرتے ۔ بی جے پی باتوں کو توڑ مروڑ کر پیش کرنے کی عادی ہے۔ یہ کھسیانی بلی ستون نوچے والی بات ہے۔ آنند شرما نے کہا کہ کرناٹک انتخابات میں مرکزی ایجنسیوں کی مدد لی گئی۔ ہمارے بیس ممبران اسمبلی کے انتخابی مہم میں عمداً پریشانیاں پیدا کی گئیں۔ پوری کوشش کی گئی کہ انتخابی مہم سے توجہ ہٹ جائے ۔آنند شرما نے کہا کہ بی جے پی نے کرناٹک انتخابات میں تقریبا ساڑھے چھ ہزار کروڑ روپیہ خرچ کیا۔ 20۔20 کروڑ پرچار میں خرچ کرنے کے لئے دیا، چار ہزار کروڑ ممبران اسمبلی کی خرید فروخت کے لئے رکھا ۔ اس تناظر میں امت شاہ کے بیان کو بھی دیکھنا چاہیے کہ جس میں انہوں نے کہا ہے کہ اگر کانگریسی اتحاد کے ممبران اسمبلی کو یرغمال نہ بنایا جاتا تو آج بھاجپا کی سرکار ہوتی ۔