بنگلورو،21 مئی (ایس او نیوز) معیاری تعلیم کی سہولت فراہم کرنے کی غرض سے امسال سے ہی تمام 176 تعلقوں کے پری یونیورسٹی کالجوں میں کرناٹک پبلک اسکول قائم کرنے کیلئے محکمہ تعلیمات کی طرف سے سرکاری احکامات جاری کردیئے گئے ہیں ۔ سرکاری اسکولوں میں داخلہ لینے والے بچوں کی تعداد میں ہر سال کمی واقع ہورہی ہے اس لئے حکومت نے ایک ہی چھت تلے پرائمری اسکول سے ہائی اسکول تک معیاری تعلیم کی سہولت فراہم کرنے کا فیصلہ کیا ہے ۔ ہر تعلقہ میں ایک پری یونیوسٹی کالج کی نشاندہی کی گئی ہے ۔ حکومت کے اس منصوبے کو پایہ تکمیل تک پہنچانے کے لئے تیاریاں کرنے محکمہ کے ڈپٹی ڈائرکٹر نے متعلقہ ذمہ داروں کو ہدایت دی ہے۔ باوثوق ذرائع سے ملنے والی اطلاع کے مطابق کرناٹک نالج کمیشن نے حکومت کو ایک رپورٹ پیش کی تھی جس میں سفارش کی تھی کہ پرائمری ، مڈل ، ہائی اسکول اور پری یونیورسٹی ایجوکیشن نامی 4 شعبے محکمہ تعلیمات کی حدود میں آتے ہیں ۔ ہر شعبہ میں داخلہ لینے اور اسکول کو خیرباد کہہ دینے والے طلباء کا ریکارڈ موجود نہیں رہتا ۔ اس سے معیاری تعلیم پر بُرا اثر پڑتا ہے اس کے ساتھ ہی ایس ایس ایل سی اور پی یو سی کے نتائج بھی توقع کے مطابق نہیں آتے ۔ ان تمام باتوں پر غور کرنے کے بعد محکمہ تعلیمات نے طلباء کو معیاری تعلیم فراہم کرنے کے لئے دیہی علاقوں میں ایک ہی چھت تلے کرناٹک پبلک اسکول قائم کرنے کا فیصلہ کیا ہے ۔ اس سے اسکولوں میں بنیادی سہولت کے ساتھ ہی اساتذہ کی تعلیمی صلاحیت بھی بڑھے گی اور طلباء کو بہترین تعلیم بھی فراہم ہوگی ۔ اس رپورٹ میں موجود سفارشات پر غور کرنے کے بعد محکمہ تعلیمات ان سفارشات کو جاری کرنے پر آمادہ ہوئی ہے ۔ جاریہ سال سے ہی ریاست کے 176 تعلقوں میں کرناٹک پبلک اسکول قائم کرنے کا فیصلہ کیا ہے ۔ ان اسکولوں کی کامیابی کے بعد ہر ہوبلی کی حدود میں کرناٹک پبلک اسکول قائم کرنے کا فیصلہ محکمہ کے زیرغور ہے ۔ بتایا جارہا ہے کہ اس اسکول میں بچوں کیلئے بہترین کمرے ، ہائی ٹیک لیابریٹری، کمپیوٹر لیاب، لائبریری ، پینے کا شفاف پانی، کھیل کا میدان ، لڑکے اور لڑکیوں کے لئے علاحدہ بیت الخلاء کا انتظام رہے گا ۔ طلباء کی تعداد کے مطابق ان اسکولوں میں اساتذہ کا تقرر کیا جائے گا ۔ اسکولوں میں ہی بچوں کو مسابقتی امتحان کیلئے تربیت بھی دی جائے گی ۔ پیشہ وارانہ تعلیم، آرٹ، سنگیت وغیرہ کی تربیت دینے کے لئے ’ گروچیتن ‘ نامی پروگرام منعقد کیا جائے گا اس کیلئے خصوصی اساتذہ کا بھی تقرر ہوگا ۔ کرناٹک پبلک اسکول میں طلباء کو آرٹس، کامرس اور سائنس کے موضوعات پڑھائے جائیں گے ۔ انگریزی زبان اور حساب کی پڑھائی پر زیادی توجہ دی جائے گی ۔ ہائی اسکول اور پری یونیورسٹی کے طلباء کو ٹیکنالوجی کی مدد والی پڑھائی (ٹی اے ایل پی ) پر خصوصی توجہ دی جائے گی ۔