بنگلورو،22؍جون (ایس او نیوز) ریاستی وزیر برائے غذا وشہری رسدات، اقلیتی امور، اوقاف وحج بی۔ زیڈ۔ ضمیر احمد خان نے بتایا کہ ریاست میں 20؍ہزار فیر پرائز شاپ (راشن ڈپو) موجود ہیں۔ عوام کو کسی بھی طرح کے دھوکہ سے باز رکھنے کے لئے محکمہ کی جانب سے ہی الیکٹرانک ترازو خرید کر تقسیم کرنے پر غورکیاجارہا ہے۔

یہاں اخباری نمائندوں سے بات کرتے ہوئے ضمیر احمد خان نے بتایا کہ فی ترازو کم از کم 15؍ہزار کے حساب سے 20؍ہزار ترازو کی خریدی کے لئے 30؍کروڑ روپئے درکار ہیں۔ انہوں نے بتایا کہ حکومت نے راشن ڈپو مالکان کے لئے دیئے جانے والے کمیشن میں اضافہ کرتے ہوئے فی کنٹال 87؍روپیوں سے بڑھاکر 100روپئے کئے ہیں۔ انہوں نے بتایا کہ جدید الیکٹرانک ترازو کی رقم راشن ڈپو مالکان سے قسط وار حاصل کی جائے گی۔ اس سے حکومت پر کوئی بوجھ نہیں پڑے گا۔ انہوں نے بتایا کہ ہر ایک تعلق میں تین روز قیام کرتے ہوئے محکمۂ غذا وشہری رسدات کے ا فسران کے ہمراہ ’’ فوڈ جنتادرشن‘‘ شروع کریں گے جہاں مقامی افراد کو راشن حاصل کرنے میں درپیش مسائل ، بی پی یل کارڈز حاصل کرنے میں ہورہی دشواریاں دیگر مسائل کو موقع پر ہی حل کرتے ہوئے عوامی مسائل کو بروقت و بر موقع دور کریں گے۔ انہوں نے بتایا کہ بی پی یل کارڈ ہولڈرس کو راشن حاصل کرنے کے لئے فنگر پرنٹ لیا جارہا ہے جو بدعنوانیوں کو روکنے میں کافی مددگار ثابت ہورہا ہے۔

انہوں نے بتایا کہ ریاست بھر میں جملہ 174تعلقہ جات میں سے 5؍تعلقہ جات پہاڑی علاقوں میں ہیں جہاں نیٹ ورک کی پریشانی کی وجہ سے فنگر پرنٹ لینا دشوار ہوچکا ہے۔ انہوں نے بتایا کہ پہاڑی علاقوں کے تعلقہ جات میں موجود راشن ڈپوؤں میں وجلین کمیٹی تشکیل دیں گے ۔ کمیٹی کے دو افراد کو بٹھائیں گے جو خط غربت سے نیچے والے خاندانوں کی نشاندہی کرتے ہوئے انہیں راشن حاصل کرنے کا موقع فراہم کریں گے۔ انہوں نے بتایا کہ اس اقدام سے حقداروں کا حق انہیں حاصل ہوگا اور راشن کے غلط استعمال پر مکمل روک لگ سکے گی۔ انہوں نے بتایا کہ اقلیتوں کی اکثریت والے علاقوں کی ترقی کیلئے سابقہ سدارامیا حکومت نے جو اسکیم شروع کی ہے اسے جاری رکھتے ہوئے آگے بڑھائی جائے گی۔ انہوں نے بتایا کہ تعلقہ جات میں جہاں ا قلیتی طبقات کی آبادی زیادہ ہے وہاں کئے جانے والے تعمیراتی کاموں کی فہرست تیارکرکے مقامی قائدین، عمائدین اور منتخب قائدین کے ساتھ تبادلہ خیال کرنے کے بعد تعمیراتی کاموں کے لئے فوری 5؍سے 6؍کروڑ روپئے کے تعمیراتی کاموں کے لئے بروقت فنڈ جاری کریں گے۔ انہوں نے بتایا کہ اس کا آغاز وہ ٹمکور ضلع کے کنیگل تعلق سے کریں گے۔ اس کے بعد مرحلہ وار دیگر تعلقہ جات کا خود دورہ کرتے ہوئے مذکورہ فنڈ بروقت جاری کریں گے۔