بنگلورو،23؍اگست(ایس او نیوز) ریاست بھر کے 104 بلدی اداروں کے لئے 31 اگست کو ہونے والی پولنگ میں حصہ لینے کے خواہش مند 8547امیدواروں نے اپنی نامزدگیاں داخل کردی ہیں۔ آج نامزدگی داخل کرنے کے آخری دن 104 بلدی اداروں کے لئے مذکورہ تعداد میں امیدواروں نے نامزدگی کے اندراج کا سلسلہ مکمل کرلیا۔

کانگریس ، جنتادل (ایس) اور بی جے پی کے حمایت یافتہ امیدوار ان انتخابات میں میدان میں اترے ہیں، بی جے پی اس کوشش میں ہے کہ زیادہ سے زیادہ سیٹوں پر قبضہ جما کر ریاست کے زیادہ سے زیادہ دیہی علاقوں میں اپنی پکڑ مضبوط کرے تو دوسری طرف حکمران جنتادل (ایس) کانگریس اتحاد کے درمیان دوستانہ مقابلہ ہورہا ہے۔ کانگریس اور جنتادل (ایس) نے مقامی سطح پر مفاہمت کے لئے اپنی اپنی پارٹی یونٹوں کو اختیار دے دیا ہے۔جہاں مفاہمت نہ ہو پائے وہاں پر مقابلہ کیا جائے گا۔

بجز کورگ ضلع ریاست کے 104بلڈی اداروں کے تحت آنے والے 2500 وارڈوں کے لئے کانگریس نے 2253 بی جے پی نے 2191، جنتادل (ایس) نے 1286 ، بی ایس پی نے111 گیارہ اور دیگر پارٹیوں نے 170 امیدوار کھڑا کئے ہیں ، جبکہ 2539امیدوار آزاد ہیں۔ پرچۂ نامزدگی واپس لینے کے لئے کل آخری تاریخ ہوگی، جس کے بعد توقع ہے کہ بلدی اداروں کے لئے انتخابی مہم شدت اختیار کرلے۔