جنوبی کینرا اور اُڈپی میں ہوئے بلدی انتخابات میں بی جے پی نے ماری بازی۔ اڈپی ، سالیگرام، کنداپوراور پتور میں اقتدار پر قبضہ
منگلورو 3ستمبر (ایس ا و نیوز) حال ہی میں اختتام پزیر ہونے والے مقامی بلدیاتی انتخابات میں جنوبی ساحلی علاقے میں بی جے پی نے کانگریس کو پیچھے چھوڑ تے ہوئے اڈپی ، سالیگرام، پتور اور کنداپور میں اقتدار پر قبضہ کرلیا ہے۔ کانگریس الال اور بنٹوال میونسپالٹی پر اپنا جھنڈا لہرانے میں کامیاب رہی ہے۔جبکہ کارکلا میں کانگریس اور بی جے پی کو یکساں 11نشستیں ملی ہیں، اورایک نشست جیت کر آزاد امیدوار یہاں پر کنگ میکر بن گیا ہے۔
پتور میونسپالٹی میں بی جے پی نے 25نشستیں حاصل کیں اور کانگریس کے حصے میں صرف 5نشستیں آئیں۔بنٹوال میں کانگریس کو 12، بی جے پی کو 11 اور ایس ڈی پی آئی کو 4نشستیں ملیں۔الال میں کانگریس نے 13سیٹ پر حاصل کی تو بی جے پی کے حصے میں 6اورایس ڈی پی آئی کے حصے میں 6سیٹیں آئیں۔جبکہ جے ڈی ایس کو یہاں پر 4نشستیں حاصل ہوئیں۔سالیگرام ٹاؤن پنچایت میں بھی بی جے پی نے جیت درج کی ۔ اڈپی سٹی میونسپل کاونسل میں بی جے پی کو31سیٹیں ملیں جبکہ کانگریس کے حصے میں صرف 4نشستیں آئیں۔
اس دوران کلّاپو نامی مقام پروزیر یو ٹی قادر کے قریبی کہے جانے والے عثمان کلّاپو کی آزاد امیدوار کے ہاتھوں شکست کے بعد شرپسندوں کی طرف سے دکانوں پر پتھراؤ کیے جانے کی بھی خبر موصول ہوئی ہے۔