بنگلورو،16؍اگست(ایس او نیوز) ریاست کے بیشتر اضلاع میں سیلاب اور طوفانی برسات کے سبب مچی تباہی سے نپٹنے کے لئے حکومت نے متاثرہ اضلاع کو دو سو کروڑ روپیوں کا فنڈ جار ی کردیا ہے۔ یہ بات آج وزیر اعلیٰ ایچ ڈی کمار سوامی نے کہی۔

آج بارش سے بری طرح متاثرہ اضلاع کے اعلیٰ افسروں کے ہمراہ صورتحال کا جا ئزہ لینے کے بعد وزیر اعلیٰ نے کہاکہ کورگ ، دکشن کنڑا، اڈپی ، شمالی کینرا ، ہاسن اور چکمگلور اضلاع میں فوری راحت کاری کے لئے دو سو کروڑ روپیوں کی رقم بلاتاخیر جاری کردی جائے گی۔

انہوں نے کہاکہ جہاں بھی بارش سے جان ومال کا نقصان ہوا ہے اس کا افسروں کے ساتھ انہوں نے تفصیلی جائزہ لیا ۔ افسروں سے یہ بھی کہا گیا ہے کہ اضلاع میں مچی رہی تباہی کے متعلق تفصیلی رپورٹ حکومت کو روانہ کردی جائے۔ وزیراعلیٰ نے بتایاکہ پچھلے چار پانچ دنوں کے دوران کورگ میں معمول کے مقابل 175 فیصد ، اڈپی میں 62 فیصد ، شیموگہ 117 فیصد، چکمگلور میں 170فیصد، شمالی کینرا میں 81 فیصد ، ہاسن میں 130فیصد اضافی بارش ہوئی ہے۔ ان تمام اضلاع کے انچارج وزراء سے کہا گیا ہے کہ وہ اپنے اپنے اضلاع میں مقیم رہیں اور راحت کاری کے کاموں کی از خود نگرانیں کریں۔ بری طرح متاثرہ اضلاع میں عوام کی مدد کے لئے 29 راحت کیمپ قائم کئے گئے ہیں جہاں 1755 لوگوں کو سہارا دیا گیا ہے۔

انہوں نے کہ کورگ میں دو ، اڈپی اور شیموگہ میں ایک ایک شخص کی موت ہوئی ہے۔ بارش سے متاثرہ علاقوں میں راحت کاری کے لئے فوج کی مدد لی گئی ہے۔ فوجی جوان ہیلی کاپٹروں کی مدد سے نشیبی علاقوں میں پھنسے لوگوں کو باہر نکالنے کا کام انجام دے رہے ہیں۔ انہوں نے کہاکہ بعض مقامات پر خراب موسم کی وجہ سے ہیلی کاپٹر اڑان نہیں بھر پارہے ہیں۔ کل صبح ان علاقوں میں دوبارہ ہیلی کاپٹرس روانہ کرنے کی کوشش کی جائے گی۔

انہوں نے کہاکہ جہاں بھی اناج کی کمی کی شکایت ہو اس سلسلے میں اضلاع کے ڈپٹی کمشنروں کی رپورٹ کی بنیاد پر اناج پہنچانے کے لئے انتظامات کئے جائیں گے۔ متاثرہ اضلاع کے ڈپٹی کمشنروں کے دفاتر میں 24گھنٹوں پر مشتمل کنٹرول رومس قائم کئے گئے ہیں۔ کمار سوامی نے بتایاکہ ریاستی حکومت کی طرف سے جا ری کئے گئے 200کروڑ روپیوں کے علاوہ ڈپٹی کمشنروں کے کھاتوں میں 237 کروڑ روپے پہلے ہی موجود ہیں۔ اس رقم سے راحت کاری مہم کو آگے بڑھانے میں مدد ملے گی اور فنڈز کی کوئی قلت نہیں ہوگی۔ اس موقع پر وزیراعلیٰ کے ہمراہ وزیر دیہی ترقیات کرشنا بائرے گوڈا، وزیر مالگزاری آر وی دیش پانڈے ، وزیر شہر ی ترقیات یو ٹی قادر، وزیر سیاحت سارا مہیش ، چیف سکریٹری ٹی ایم وجئے بھاسکر، اور دیگر موجود تھے۔