ریاستی حکومت کی جانب سے ڈگری کے تمام طلباء کو مفت لیاپ ٹاپ
بنگلورو، 13 ؍ستمبر(ایس او نیوز) ریاستی وزیر اعلیٰ ایچ ڈی کمار سوامی نے یہ اعلان کیا ہے کہ حکومت ریاست کے تمام ڈگری کی تعلیم حاصل کرنے والے طلباء کو مفت لیاپ ٹاپ فراہم کرے گی، اس سے قبل صرف درج فہرست ذاتوں اور قبائل کے طلباء کو مفت لیاپ ٹاپ فراہم کئے جاتے تھے۔ میسور کے مہارانی کالج میں ایک تقریب سے خطاب کر تے ہوئے وزیر اعلیٰ ایچ ڈی کمار سوامی نے اعلان کیا ہے کہ حکومت اس بات کی پابند ہے کہ ہر ایک طالب علم کمپیوٹر کی تعلیم حاصل کرنے والا بنے اور اسی لئے سابقہ پروگرام جو معاشرہ کے صرف ایک طبقہ کو لیاپ ٹاپ فراہم کر تا تھا اس میں مزید توسیع کی گئی ہے۔انہوں نے یہ اعلان بھی کیا کہ ریاستی حکومت ریاست بھر میں ڈگری کالجوں کی ترقی کے لئے ایک ہزار کروڑ روپئے جاری کرے گی، انہوں نے بتایا کہ ’’ہم مزید کمپنیوں سے رابطہ کر رہے ہیں اور ان سے گذارش کی جا ئے گی کہ وہ کارپوریٹ سوشیل ریسپانسبلٹی (سی ایس آر) اقدام کے تحت سرکاری تعلیمی اداروں کا تعاون کریں‘‘۔