بنگلورو،22؍نومبر(ایس او نیوز) ریاستی حکومت کی طرف سے فٹ پاتھوں پر تجارت کرنے والے غریب تاجروں کو سودمافیا سے آزاد کرانے کے لئے انہیں آسان قسطوں اور کم شرح سود پر قرضے فراہم کرنے کے لئے تیار کی گئی ’’بڑاورا بندھو‘‘ اسکیم کا نفاذ کل سے کرنے جارہی ہے۔ کل وزیراعلیٰ ایچ ڈی کمارسوامی اے پی ایم سی مارکیٹ میں اس اسکیم کا افتتاح کریں گے۔ اس اسکیم کے تحت چھوٹے تاجروں اور وہ تاجر جو فٹ پاتھ پر اپنے اسباب فروخت کرتے ہیں جنہیں ریاستی حکومت کی طرف سے شناختی کارڈ مہیا کرایا گیا ہے، اس اسکیم کے تحت بلا سودی قرضہ آسانی سے حاصل کرسکیں گے۔ بتایا جاتاہے کہ فٹ پاتھوں پر معمولی تجارت کرنے والے غرباء کا بہت بڑا طبقہ اپنی تجارت کے لئے درکار قرضوں کی وجہ سے سود مافیا کے نرغے میں آچکا ہے۔ وزیراعلیٰ ایچ ڈی کمارسوامی نے ذاتی دلچسپی دکھاتے ہوئے اس طبقے کو سود مافیا کی گرفت سے آزاد کرانے کے لئے ایک ایسی اسکیم تیار کرنے اعلیٰ افسروں کو ہدایت دی تھی، جس کے ذریعے ان تاجروں کو آسانی کے ساتھ تجارت کے لئے قرضہ بھی ملے اور ان پر سود کا کوئی بوجھ بھی نہ پڑے ، اسی مقصد کو ذہن میں رکھتے ہوئے ریاستی حکومت کی جانب سے بڑاورا بندھو اسکیم متعارف کرائی جارہی ہے۔ کل وزیر اعلیٰ اس اسکیم کے افتتاح کے ساتھ قرضے تقسیم کرنے کے لئے سرکاری موبائل وین کو بھی ہری جھنڈی دکھائیں گے۔ خاص طور پر ایسے تاجر جو فٹ پاتھوں پر چھوٹی موٹی تجارت کرتے ہیں ، ٹھیلہ گاڑیوں پر پھل ، پھول ، ترکاری وغیرہ فروخت کرتے ہیں سڑک کے کناروں پر کپڑے بیچتے ہیں ، چپل کی تجارت کرتے ہیں یا پھر ان کی مرمت کرتے ہیں۔ کھلونے اور گھریلو استعمال کی اشیاء فروخت کرتے ہیں ان کے لئے یہ قرضہ دیا جارہاہے۔ان تاجروں کو سرمایہ کے طور پر دو سے دس ہزار روپیوں تک کا قرضہ مہیا کرایا جائے گا۔ روزانہ یا ہفتہ واری بنیاد پر ان تاجروں کو اپنے قرضے کی ادائیگی کرنی ہوگی، محکمۂ کوآپریشن کی طرف سے اس اسکیم کی شروعات کی جارہی ہے۔