کرناٹک کو مرکزی ٹیم روانہ کرنے مودی کی یقین دہانی
بنگلورو،10؍ستمبر(ایس اونیوز) کورگ اور ملناڈ علاقوں میں سیلاب اور بارش کی وجہ سے مچی تباہی کا جائزہ لینے کے لئے عنقریب ایک مرکزی ٹیم روانہ کی جائے گی۔ وزیراعظم نریندر مودی نے آج وزیراعلیٰ ایچ ڈی کمارسوامی کی ان سے ملاقات کے دوران یہ یقین دہانی کرائی۔
وزیر اعلیٰ کی قیادت میں وفد نے وزیراعظم کو ریاست میں مچی تباہی کے بارے میں تفصیلات فراہم کیں ، ان تمام کو سننے کے بعد وزیراعظم نے کہاکہ ریاست میں سیلاب کی وجہ سے جو تباہی مچی ہے اس کا جائزہ لے کر مرکزی حکومت کو رپورٹ پیش کرنے اعلیٰ افسروں کی ٹیم عنقریب بنگلور بھیجی جائے گی۔
وزیراعظم سے کرناٹک کے لئے دو ہزار کروڑ روپیوں کا پیکیج منظور کرنے کے مطالبے پر انہوں نے کوئی ردعمل ظاہر نہیں کیا، اس کے علاوہ ریاست کے 17اضلاع کے خشک سالی کے بارے میں بھی تمام تفصیلات پیش کئے جانے کے باوجود وزیراعظم خاموش رہے۔ البتہ وفد میں شامل اراکین کو دیکھ کر انہوں نے یہ طنز یہ فقرہ ضرور کسا کہ آدھا وفد تو دیوے گوڈا کا خاندان ہی ہے۔ وفد میں شامل سات اراکین میں سے تین کا تعلق دیوے گوڈا خاندان سے تھا، خود دیوے گوڈا اور ان کے دو فرزند وزیراعلیٰ کمار سوامی اور وزیر تعمیرات عامہ ایچ ڈی ریونا ۔