بنگلورو،9؍جون(ایس او نیوز) فصلوں کی تباہی سے بدحال کسانوں کو ریاستی حکومت نے ایک خطرناک جھٹکا دیتے ہوئے انتظامیہ اور افسران کی مبینہ لاپرواہی کا کھلا مظاہرہ کیا ہے۔ دھارواڑ ، باگلکوٹ، منڈیا ، ہاسن اور دیگر اضلاع میں فصلوں کی تباہی سے متاثرہ کسانوں کو معاوضہ کے طور پر ان کے بینک کھاتوں میں ایک روپیہ جمع کرایا گیا ہے۔ مختلف اضلاع کے کسانوں نے حکومت کی طرف سے معاوضہ ادا کئے جانے کی خوشی میں جب بینکوں کا رخ کیا اور اپنے بیلنس کی جانچ کی تو انہیں یہ دیکھ کر کافی مایوسی ہوئی کہ ان کے کھاتوں میں صرف ایک ایک روپیہ جمع کرایا گیاہے۔ اس دوران سرکاری افسران نے 3500 کسانوں کے کھاتوں میں ایک روپیہ جمع کرائے جانے کی تصدیق کرتے ہوئے کہاکہ 87500 کسانوں کو حکومت کی طرف سے معاوضہ ادا کرنا تھا، ان میں سے 84000 کسانوں کومکمل معاوضہ ادا کیا گیا ہے ۔ باقی 3500کسانوں کے بینک کھاتوں کی تصدیق کیلئے یہ ایک روپیہ جمع کرایا گیا ہے، کیونکہ ان کسانوں کے بینک کھاتے آدھار سے منسلک نہیں ہوئے ہیں، اسی لئے یہ رقم جمع کرائی گئی ہے۔آنے والے دنوں میں معاوضہ کی مکمل رقم بھی ان کے کھاتوں میں جمع کرادی جائے گی۔ اس دوران ریاستی اسمبلی کے اپوزیشن لیڈر جگدیش شٹر نے کسانوں کے بینک کھاتوں میں معاوضہ کی رقم کے طور پر روپیہ جمع کرائے جانے کا معاملہ صفر ساعت میں اٹھایا اور حکومت کو آڑے ہاتھوں لیا۔انہوں نے کہاکہ کسانوں کے کھاتوں میں یہ رقم جمع کرانے سے قبل حکومت کو شرم نہیں آئی۔ محکمۂ مالگذاری کی یہ حرکت کسانوں کی توہین کے مترادف ہے۔ انہوں نے کہاکہ کسانوں کو جو معاوضہ دیا جارہا ہے وہ ٹھیک طرح سے ادا کیا جائے۔ دھارواڑ، ہاسن ، اور دیگر مقامات پر اس طرح کے واقعات پر انہوں نے افسوس کا اظہار کیا۔ اس مرحلے میں وزیر قانون جئے چندرا نے بھی حیرت کا اظہار کرتے ہوئے کہاکہ اس سلسلے میں تفصیلات طلب کرنے کے بعد ہی حکومت وضاحت پیش کرسکتی ہے۔