بنگلورو،24؍اپریل(ایس او نیوز) منڈیا اسمبلی حلقے سے کانگریس امیدوار کے طور پر آج مقامی صحافی گنیگا روی کو ٹکٹ دے دیا گیا۔ سابق وزیر اور فلم اداکار امبریش کی طرف سے اس حلقے سے انتخابی میدان میں اترنے سے صاف انکار کے بعد ان کی طرف سے جس امیدوار کا نام تجویز کیاگیا تھااسے نامنظور کرتے ہوئے اعلیٰ کمان نے روی کو میدان میں اتارنے کا فیصلہ کیا۔امبریش نے آج صبح ہی واضح کردیا تھاکہ اپنی خرابئ صحت کی بنیاد پر وہ انتخاب نہیں لڑ رہے ہیں۔ اس سوال پر کہ منڈیا حلقے کے امیدوار کے حق میں وہ انتخابی مہم چلائیں گے یا نہیں امبریش نے انتخابی مہم چلانے سے بھی صاف انکار کردیا۔ امبریش کو اس حلقے سے انتخابی دوڑ میں شامل ہونے کے لئے منانے والوں میں وزیر اعلیٰ سدر امیا، کے پی سی سی صدر ڈاکٹر جی پرمیشور ، اور دیگر پارٹی لیڈران شامل ہیں۔ ان تمام کی کوششوں کے باوجود بھی امبریش یہ فیصلہ نہیں لے پائے کہ وہ انتخابات میں کھڑے ہوں گے یا نہیں۔ آج جبکہ پرچۂ نامزدگی داخل کرنے کا آخری دن تھا تو پارٹی نے روی کو انتخابی میدان میں اتارنے کا فیصلہ کرلیا۔ حالانکہ اس حلقے سے سابق وزیر ایم ایس آتما نند کو میدان میں اتارنے کی مانگ کی جارہی تھی، لیکن پارٹی نے ایک نوجوان کو اس حلقے سے اتارنے کا فیصلہ کیا ہے۔