ضمنی انتخابات میں حکمران اتحاد کی تائید کرنے بائیں پارٹیوں کا فیصلہ
بنگلورو،20؍اکتوبر(ایس او نیوز) پانچ حلقوں کے ضمنی انتخابات میں کانگریس جے ڈی ایس اتحاد کے امیدواروں کی حمایت کرنے کا ریاست کی بائیں جماعتوں نے اعلان کیا ہے۔ آج کے پی سی سی دفتر میں کے پی سی سی صدر دنیش گنڈو راؤ سے ملاقات کے بعد ان لیڈروں نے یہ اعلان کیا کہ تین پارلیمانی اور دو اسمبلی حلقوں میں کانگریس اور جے ڈی ایس کے امیدواروں کو تمام بائیں پارٹیوں کی حمایت حاصل رہے گی ، ان حلقوں میں بائیں پارٹیوں کے کارکن دونوں پارٹیوں کے امیدواروں کے حق میں انتخابی مہم چلائیں گے ساتھ ہی کانگریس اور جے ڈی ایس لیڈروں کے ہمراہ یہاں کے پارٹی کارکن انتخابی جلسوں اور دیگر پروگراموں میں حصہ لیں گے۔ ان لیڈروں نے کہاکہ یہ تائید محض اس مقصد سے کی جارہی ہے کہ ضمنی انتخابات میں بی جے پی امیدواروں کو کسی بھی حال میں کامیاب ہونے نہ دیا جائے۔ آج بی جے پی اور اس کے ہمنوا ملک کو توڑنے پر تلے ہوئے ہیں اسی لئے سیکولر سیاسی جماعتیں اگر متحد ہوکر بی جے پی کو ہرانے کی کوشش کریں تو اسے ہرانا مشکل نہیں ہوگا۔ سی پی آئی کے قومی پولیٹ بیورو ممبر سباراؤ ، ٹی وی لوکیش ، اور دیگر لیڈروں نے دنیش گنڈو راؤ سے ملاقات کے بعد کہاکہ آج بی جے پی ذات پات کے نام پر ریاست اور ملک میں نفرت پھیلانے میں لگی ہوئی ہے۔ بی جے پی اور وزیر اعظم مودی کو ان کے غلط فیصلوں کا احساس دلانے کے مقصد سے اس اتحاد کو اور مضبوط کرنے کی ضرورت پر سبھی لیڈروں نے زور دیا۔