ریاست میں 103 تعلقہ جات خشک سالی سے متاثر: کاگوڈتمپا
بنگلورو29؍ستمبر(ایس او نیوز) ریاست کے بعض تعلقہ جات میں خشک سالی کی صورتحال انتہائی سنگین ہوچکی ہے۔رواں سال خشک سالی سے متاثرہ تعلقہ جات کی تعداد 103 سے متجاوز ہوچکی ہے۔یہ بات آج وزیر مالگذاری کاگوڈ تمپا نے کہی۔اخباری نمائندوں سے بات چیت کرتے ہوئے انہوں نے کہاکہ کل کے کابینہ اجلاس میں 68 نئے تعلقہ جات کو خشک سالی سے متاثرہ قرار دیا گیا ہے۔ اس تعداد میں مزید اضافہ کا بھی خدشہ ہے۔ آج ان کی صدارت میں منعقدہ خشک سالی سے متعلق کابینہ ذیلی کمیٹی میٹنگ کے بعد انہوں نے بتایاکہ اکثر تعلقہ جات اور بعض ہوبلیوں میں خشک سالی کی صورتحال سنگین رخ اختیار کرتی جارہی ہے۔ مقامی انتظامیہ سے اس کے متعلق تمام تفصیلات طلب کی گئی ہیں۔ آئندہ ہفتہ دوبارہ اس کمیٹی کی میٹنگ ہوگی، جس میں مزید چند تعلقہ جات کو خشک سالی سے متاثرہ قرار دیا جائے گا۔ان تمام تعلقہ جات کو پینے کے پانی کی فراہمی کیلئے بورویلوں کی کھدائی پر پابندی عائد کی جاچکی ہے۔ حکومت کی طرف سے چارہ اور پانی کا انتظام کرنے کے ساتھ فصلوں کا نقصان اٹھانے والے کسانوں کو معاوضہ کیلئے بھی انتظامات کئے جارہے ہیں۔مرکزی حکومت کی قومی روزگار ضمانت اسکیم کے کرناٹک میں نفاذ کو موثر قرار دیتے ہوئے انہوں نے کہاکہ بعض علاقوں میں منتخب نمائندوں کی عدم توجہی کے سبب اس اسکیم کو متوقع نتائج نہیں مل پائے۔