بنگلورو۔4؍جنوری(ایس او نیوز) ریاستی حکومت اس بات پر سنجیدگی سے غور کررہی ہے کہ ریاست بھر میں سگریٹ نوشی پر مکمل پابندی عائد کردی جائے۔ یہ بات آج نائب وزیر اعلیٰ و وزیر قانون ڈاکٹر جی پرمیشور نے بتائی۔
ملیشورم کے بی بی ایم پی دفتر میں سگریٹ نوشی سے پاک بنگلور کی تحریک کی شروعات کرتے ہوئے ڈاکٹر پرمیشور نے کہاکہ ریاست گجرات میں جس طرح شراب بندی مہم بیداری کے ذریعے چلائی گئی اسی طرز پر کرناٹک میں بھی سگریٹ اور تمباکو نوشی کے مضر اثرات کے متعلق پولیس کی مدد سے بیداری مہم چلانے کی ضرورت ہے۔
انہوں نے کہاکہ ریاست بھر میں منشیات کے استعمال کو روکنے کے لئے جس طرح کی موثر مہم چلائی گئی ہے اس کے ذریعے کالجوں اور مختلف مرکزوں پر منشیات کی فروخت کو قابو میں کرنے میں کافی مدد ملی ہے۔ اسی طرز پر سگریٹ اور تمبا کو نوشی کے خلاف بھی زبردست مہم چلانے کی اشد ضرورت ہے۔ ریاستی حکومت کی طرف سے تعلیمی اداروں کے آس پاس سگریٹ اور دیگر تمباکو اشیاء کی فروخت پر پابندی عائد ہے اس کے باوجود بھی فروخت کا سلسلہ کئی مقامات پر برقرار ہے۔ پولیس کو چاہئے کہ ایسے مقامات کی نشاندہی کرے اور تمباکو اشیاء کی فروخت میں ملوث دکانداروں پر کارروائی کرتے ہوئے ان دکانوں کو بند کرادیا جائے۔
انہوں نے کہاکہ سرکاری اعداد وشمار کے مطابق ریاست بھر میں جو بہتر فیصد اموات ہوتی ہیں وہ غیر متعدی امراض کے نتیجے میں ہوتی ہیں ان اموات میں تمباکو کے استعمال سے ہونے والی اموات کا حصہ بہت بڑا ہے۔ اس موقع پر میئر گنگامبیکے ،بی بی ایم پی کمشنر منجوناتھ پرساد ، پولیس کمشنر سنیل کمار ، بی بی ایم پی میں حکمران پارٹی کے لیڈر شیوراجو ، اور دیگر موجود تھے۔