بیلگاوی ،19دسمبر(ایس او نیوز؍آئی این ایس انڈیا) کرناٹک میں ایچ کمار سوامی کی قیادت والے کابینہ میں توسیع 22 دسمبر کی جائے گی ۔ کابینہ میں توسیع نہ ہونے سے پارٹی کے اندر کافی عدم اطمینان کی افواہیں گردش کر رہی ہیں ۔ کانگریس پارٹی اراکین نے یہاں’’سورن ودھان سودھ‘‘ میں ملاقات کی۔

واضح ہو کہ یہاں ریاستی اسمبلی کا سرمائی اجلاس چل رہا ہے۔ یہ اجلاس ایسے وقت میں ہورہا ہے ، جب کابینہ کی توسیع سمیت کئی مسائل پر پارٹی کے اندر عدم اطمینان کی اطلاع ہے۔ پارٹی کے ذرائع نے بتایا کہ اجلاس کے دوران کئی ممبران اسمبلی نے تشویش ظاہر کی کہ مخلوط حکومت میں ترقی کا مسئلہ پرے ہوگیا ہے ۔

انہوں نے پارٹی قیادت سے اس مسئلے کو کانگریس جے ڈی ایس اتحاد رابطہ کمیٹی کی میٹنگ کے دوران وزیر اعلی سے اس پرتبادلہ خیال کرنے کے لئے کہا۔ ممبران اسمبلی کا الزام ہے کہ ترقیاتی کاموں میں شمالی کرناٹک کو نظر انداز کیا گیا ہے اور اس علاقے کی کابینہ میں نمائندگی کی بھی کمی ہے۔ انہوں نے اشارہ کیا کہ حالیہ دنوں علاقہ سے آنے والے رکن کو قانون ساز کونسل کا چیئرمین نہیں بنایا گیا۔ کانگریس کے ایس آر پاٹل اور جنتا دل (ایس) کے با سوراج ہورٹی کو اس عہدے کا اہم دعویدار مانا جا رہا تھا؛ لیکن آخری وقت میں اس کے لئے پرتاپ چندر شیٹی کا نام منتخب ہوا۔ اجلاس کے بعد نامہ نگاروں سے بات کرتے ہوئے سدارمیا نے کہا کہ ہم نے ممبران اسمبلی کو بتایا کہ ٹائم ٹیبل کے مطابق ہی کابینہ میں توسیع 22 دسمبر کو ہوگی۔

انہوں نے کہا کہ کچھ لیڈروں کا خیال ہے کہ کابینہ کی توسیع اور بورڈ اور کارپوریشنز کی تقرریوں میں شمالی کرناٹک کو ترجیح ملنی چاہئے۔جب ان سے پوچھا گیا کہ کابینہ میں ردوبدل ہوگا توان کا کہنا تھا کہ یہ ممکن ہے ۔ سابق وزیراعلیٰ سدارمیا سمیت ریاستی کانگریس کے رہنما اور ریاستی کانگریس سربراہ دنیش گڈ راؤ کانگریس صدر راہل گاندھی سے ملاقات کے لیے 20 دسمبر کو دہلی جائیں گے اور وہاں کابینہ کی توسیع پر تبادلہ خیال کریں گے۔