بنگلورو،10 ؍فروری (ایس او نیوز؍آئی این ایس انڈیا) وزیر اعظم نریندر مودی کی طرف سے لوک سبھا انتخابات کے لئے کرناٹک میں بی جے پی کے انتخابی مہم کے آغاز کے کچھ گھنٹے پہلے کانگریس نے اتوار کو بی جے پی سے ریاست میں مخلوط حکومت کو گرانے کے بارے میں سوال کیا۔

ریاستی کانگریس صدر دنیش گڈو راؤ نے مودی کے سامنے کچھ سوالات رکھے اور ان سے جواب مانگا۔انہوں نے سوال کیاکہ آپ کا(مودی) مقبول نعرہ رہا ہے، نہ کھاؤں گا، نہ کھانے دوں گا‘تب آپ نے کرناٹک میں اپنے پارٹی لیڈروں کو ممبران اسمبلی کی خرید فروخت کیوں کرنے دیا؟ کیا آپ اقتدار کے لئے غیر اخلاقی قدم اٹھانے کو تیار ہیں؟ انہوں نے سوال کیاکہ آپ اپنی پارٹی کے لیڈر (بی ایس) یدی یورپا کے سامنے آئے ایک آڈیو کلپ میں بیانات کو کس طرح مناسب ٹھہراتے ہیں جس میں یدیورپا نے ممبران اسمبلی کو پارٹی بدلنے کے لئے رقم کی پیشکش کی اور عدالتی نظام پر آپ نے غیر قانونی کنٹرول کے بارے میں بات کی۔انہوں نے کہاکہ براہ مہربانی ہبلی کے اپنے دورے کے دوران ان جائز سوالات کا جواب دیں۔ان سوالات کی نوعیت سیاسی نہیں ہے۔یہ عوامی اہمیت کے قابل زیرغور سوالات ہیں، خاص طور پر کرناٹک کے لوگوں کے لئے۔

قابل ذکر ہے کہ کرناٹک کے وزیر اعلی ایچ ڈی کمارسوامی نے جمعہ کو ایک آڈیو کلپ جاری کیا تھا جس میں یدی یورپا مبینہ طور پر جدیس ممبر اسمبلی ناگنگوڈا کو ان کے بیٹے کے ذریعے لبھانے کی کوشش کر رہے ہیں۔حالانکہ صوبہ بی جے پی لیڈر یدی یورپا نے آڈیو کلپ کو ’فرضی‘ اور من گھڑت کہانی قرار دیا ہے۔