بنگلورو،30؍جولائی(ایس او نیوز) ریاستی حکومت کھیل کود کی صلاحیتوں کو پروان چڑھانے میں دلچسپی رکھتی ہے، اس کے لئے درکار انفرااسٹرکچر سہولتیں فراہم کرنے کی حکومت پابند ہے۔

یہ بات آج نائب وزیراعلیٰ ڈاکٹر جی پرمیشور نے کہی اور کہاکہ حکومت کا یہ منشاء ہے کہ بنگلور کو ملک میں کھیل کود کی راجدھانی بنایا جائے۔ اپنی رہائش گاہ پر معروف ٹینس کھلاڑی روہن بوپنا کی قیادت میں کھلاڑیوں کے ایک وفد سے ملاقات کے بعد انہوں نے اخباری نمائندوں سے کہاکہ ریاستی حکومت نے کھیل کود کے لئے بجٹ میں زیادہ فنڈ مہیا کرائے ہیں مضافات بنگلور میں ایک گیمس ولیج کی تعمیر اور عالمی درجے کا اسپورٹس انفرااسٹرکچر فراہم کرنے کے لئے حکومت کی طرف سے ہر ممکن مدد کا یقین دلایا گیا ہے۔

انہوں نے کہاکہ شہر کے کبن پارک میں ٹینس کورٹ اور دیگر سہولتیں موجود ہیں، لیکن چند شرائط کی وجہ سے ان سہولتوں کا استعمال عوام نہیں کرپاتے۔ آنے والے دنوں میں ایسے ٹینس کورٹ بنائے جائیں گے جن تک عوام کی رسائی ہو اور ان کا معیار بھی بین الاقوامی ہو۔