کرناٹک کابینہ میں توسیع کی تیاریاں زوروں پر؛ وزارت کی دعویداری پر کانگریس اور جنتادل (ایس) میں رسہ کشی
بنگلورو،2؍جون(ایس اونیوز) ریاست کرناٹک کی مخلوط حکومت میں کابینہ کی تشکیل 6؍ جون کی دوپہر دوبجے طے کی گئی ہے، جس کے ساتھ ہی وزارت کی دعویداری کرتے ہوئے کانگریس اور جنتادل (ایس) میں رسہ کشی کا دور شدت اختیار کرگیا ہے۔ جنتادل (ایس) کے اراکین اسمبلی وزارت کے لئے پارٹی سربراہ ایچ ڈی دیوے گوڈا کے گھر کا چکر کاٹ رہے ہیں تو دوسری طرف کانگریس میں وزارت کے دعویدار اے آئی سی سی جنرل سکریٹری وینو گوپال اور دہلی میں دیگر لیڈروں سے ربط میں ہیں۔
وینو گوپال کل وزارت کے متعلق اے آئی سی سی صدر راہل گاندھی سے تبادلۂ خیال کریں گے اور اس کے بعد وزارت کی فہرست کو قطعیت دی جائے گی۔ دورۂ امریکہ پر روانہ راہل گاندھی آج رات ہندوستان واپس ہوجائیں گے۔ اس کے بعد کل صبح وینو گوپال ان سے ملاقات کرکے قلمدانوں کی تقسیم پر تبادلۂ خیال کریں گے۔
جنتادل (ایس) اور کانگریس کے ساتھ آزاد اراکین اسمبلی ناگیش ، آر شنکر اور بی ایس پی کے مہیش کی بحیثیت وزیر حلف برداری یقینی مانی جارہی ہے۔ اس کے علاوہ جنتادل (ایس) سے ایچ ڈی ریونا ، ایچ وشواناتھ، بسوراج ہوراٹی ، بی ایم فاروق، سی ایس پٹ راجو ، جی ٹی دیوے گوڈا ، بنڈپا قاسم پور ، اے ٹی رام سوامی وغیرہ بحیثیت وزیر حلف لے سکتے ہیں۔
کانگریس میں وزارت کے دعویداروں کی فہرست کافی طویل ہے۔ ان میں ڈی کے شیوکمار، آر وی دیش پانڈے، ایم بی پاٹل، روشن بیگ ، کے جے جارج ، کرشنا بائرے گوڈا، تنویر سیٹھ، پریانک کھرگے ، ایس آر پاٹل ، دنیش گنڈو راؤ ، ستیش جارکی ہولی ، شیوانند پاٹل، امرے گوڈا بیا پورا ، لکشمی ہبالکر ، اجئے سنگھ، یشونت راؤ پاٹل، پٹ رنگا شٹی ، ڈاکٹر سدھا کر اور دیگر وزارت کے لئے مسلسل جدوجہد میں لگے ہوئے ہیں۔