بنگلورو،29؍مئی(ایس او نیوز) وزیر اعلیٰ کمار سوامی نے کہا ہے کہ ریاستی کابینہ کی تشکیل کے معاملے میں کانگریس اور جنتادل (ایس) قیادت میں مفاہمت ہوچکی ہے، ایک دو دنوں میں ریاستی کابینہ کی تشکیل ہوجائے گی۔ بتایاجاتا ہے کہ اہم قلمدانوں کی تقسیم کے معاملے میں بھی کانگریس اور جنتادل (ایس) میں اتفاق ہوچکا ہے، کل دہلی میں وزیراعلیٰ کمار سوامی اور کانگریس کے سینئر رہنما غلام نبی آزاد اور اے آئی سی سی جنرل سکریٹری کے سی وینو گوپال کے درمیان ہوئی ملاقات کے موقع پر اہم قلمدانوں کی تقسیم پر اتفاق ہوچکا ہے۔ اس فارمولے کے مطابق اگر وزیراعلیٰ کمار سوامی آگے بڑھیں گے تو امکان ہے کہ جمعرات کے روز ریاستی کابینہ میں توسیع کردی جائے۔ فی الوقت جو مفاہمت ہوئی ہے اس کے مطابق جنتادل (ایس) کے حصے میں خزانہ ، تعمیرات عامہ، محصولات، بنیادی وثانوی تعلیمات، مزراعی ،مویشی پالن جیسے محکمے آئے ہیں، جبکہ کانگریس میں نائب وزیراعلیٰ ڈاکٹر جی پرمیشورکو داخلہ کا قلمدان دیا جاسکتا ہے۔ توانائی کا قلمدان سینئر کانگریس رہنما ڈی کے شیوکمار کے حصے میں جاسکتاہے اس کے علاوہ کانگریس کو شہری ترقیات، صحت ، میڈیکل ایجوکیشن، ایکسائز ، کانکنی ، اعلیٰ تعلیمات اور کوآپریٹیو کے قلمدان مل سکتے ہیں۔ کمار سوامی کی طرف سے اسمبلی میں اعتماد کا ووٹ حاصل کرنے کے تقریباً ایک ہفتے بعد ریاستی کابینہ کی توسیع ہونے جارہی ہے وہ اس لئے کہ قلمدانوں کے معاملے پر دونوں پارٹیوں کے درمیان اتفاق ہونہیں پایا تھا، اے آئی سی سی صدر راہل گاندھی سے بھی اس مسئلے پر بات چیت ہوئی تھی، فی الوقت وہ اپنی ماں سونیا گاندھی کے علاج کے سلسلے میں چار روزہ دورۂ امریکہ پر روانہ ہوچکے ہیں۔ روانگی سے قبل راہل گاندھی نے غلام نبی آزاد کو یہ اختیار دیاتھا کہ اس معاملے کو باہمی بات چیت کے ذریعے سلجھائیں،اب جبکہ کمار سوامی کی غلام نبی آزاد سے بات چیت ہوچکی ہے ۔ یہ امکان ظاہر کیا جارہا ہے کہ کابینہ میں توسیع کردی جائے گی۔ توسیع کے اس مرحلے میں علاقائی نمائندگی مختلف طبقات کے کامیاب اراکین کی بنیاد پر نمائندگی وغیرہ کو خاطر میں رکھا گیا ہے۔