بنگلورو،8؍اکتوبر (ایس او نیوز)اے آئی سی سی کے صدر راہل گاندھی سے ملاقات نہیں ہوسکی۔ لیکن کانگریس کے ریاستی نگراں کار کے سی وینو گوپال کے ساتھ ریاستی کابینہ کی توسیع کے سلسلہ میں بات چیت ہوئی ہے ۔ کابینہ کی توسیع اور بورڈوکارپوریشنوں کے صدور کی تقرری کامعاملہ جلد از جلد نمٹانے کی صلاح دی گئی ہے۔ یہ باتیں سابق وزیر اعظم ایچ ڈی دیوے گوڈا نے کہیں۔ اخباری نمائندوں سے بات کرتے ہوئے دیوے گوڈا نے کہا کہ نئے قلمدانوں کی تقسیم، بورڈ اور کارپوریشنوں میں صدور ونائب صدور کی تقرری کی کارروائی مکمل کرنے کامشورہ دیا گیا ہے ۔ ریاستی اسمبلی اور لوک سبھا کے ضمنی انتخابات کیلئے الیکشن کمیشن نے کل ٹائم ٹیبل جاری کردیا ہے ۔ کانگریس اورجے ڈی ایس کے مابین اتحاد کے سلسلہ میں ابھی فیصلہ نہیں ہوا ہے ۔ اس کیلئے دو تین دن کا وقت درکار ہے ۔ انہوں نے کہا کہ منڈیا لوک سبھا حلقہ سمیت اب تک کسی بھی حلقہ کیلئے امیدوار کا حتمی فیصلہ نہیں کیا گیا ہے ۔ ایک دو دن کے بعد امیدواروں کی انتخابی کارروائی مکمل کرلی جائے گی۔