ہمارے لئے اگلے انتخابات میں کرناٹک ہی برانڈ ہے، گجرات یا کسی اور ریاست کا ماڈل یہاں نہیں چلے گا: سدرامیا
بنگلورو:13/ مئی (ایس او نیوز) ریاست میں کانگریس حکومت کے چار سال کی تکمیل اور پانچویں سال میں داخلہ کے سلسلے میں آج چترادرگہ میں محکمہئ سماجی بہبود اور دیگر سرکاری محکموں کی طرف سے گورنمنٹ سائنس کالج میدان میں زبردست جلسہئ عام منعقد کیاگیا، جس میں وزیر اعلیٰ سدرامیا سمیت کابینہ کے تقریباً تمام وزراء نے شرکت کی۔ اس موقع پر اپنے خطاب میں سدرامیا نے کہاکہ بی جے پی کی طرح کانگریس کیلئے حکمرانی کاماڈل گجرات نہیں،بلکہ کرناٹک میں کانگریس کیلئے حکمرانی کاماڈل کرناٹک ہی ہے۔ ریاست میں تمام طبقات، ذاتوں اور زبانوں سے وابستہ لوگوں کے ساتھ انصاف کرتے ہوئے ان کی فلاح وبہبود میں مصروف ریاستی حکومت کیلئے آنے والے دنوں میں کرناٹک ہی برانڈ ہوگا۔ کرناٹک کو ترقی پرور روش پر اس حکومت نے آگے بڑھایا ہے۔ آنے والے دنوں میں بھی اسی رفتار سے ترقی کو جاری رکھ کر انتخابات کا سامنا کیا جائے گا۔ انہوں نے کہاکہ بھلے ہی اگلے انتخابات کانگریس پارٹی ان کی قیادت میں لڑے گی، لیکن پارٹی کی کامیابی کے بعد وزیراعلیٰ کون ہوگا یہ فیصلہ نومنتخب اراکین اسمبلی کریں گے، کیونکہ ہمیشہ سے انہوں نے جمہوریت پر یقین کیا ہے، کسی بھی مرحلے میں انہوں نے اپنا یک طرفہ فیصلہ حکومت یا پارٹی پر مسلط نہیں کیا۔ تمام کو اعتماد میں لے کر ہی ریاست کو ترقی کی جانب آگے بڑھانے کیلئے جدوجہد جاری رکھی جائے گی۔ انہوں نے کہاکہ ریاست کی ترقی کو مقدم رکھ کر کانگریس پارٹی اگلے انتخابات میں عوام سے اعتماد کا ووٹ طلب کرے گی،اگر عوام کی دعائیں پارٹی کے ساتھ رہیں تو پارٹی کو دوبارہ اقتدار ملے گا۔ سدرامیا نے طنز کرتے ہوئے کہاکہ وہ یڈیورپا جتنے بڑے لیڈر نہیں ہیں کہ 150سے زائد سیٹوں پر کامیابی حاصل کرنے کا دعویٰ کریں۔ وہ چاہتے ہیں کہ عوام کانگریس پارٹی کو اتنی واضح اکثریت دیں کہ وہ ان کی خدمت مسلسل کرتی رہے۔ ریاست کو ہمہ جہت ترقی کی جانب بڑھانے کا جو عزم پارٹی نے کیا ہے اس کو تکمیل تک پہنچایا جائے گا۔ انہوں نے کہاکہ پچھلے چار سال کے دوران عوام کے اعتماد کو مجروح کئے بغیر کانگریس پارٹی نے ریاست میں کام کیا ہے۔ بقیہ ایک سال میں بھی یہی کوشش کی جائے گی کہ عوام کے اعتماد کو مجروح ہونے نہ دیا جائے، اور ان کی امنگوں کی تکمیل کے ساتھ آنے والے دنوں میں اور بھی بہتر طریقے سے کام کرنے کیلئے دور اندیشی پر مبنی منصوبے تیار کئے جائیں، تاکہ کرناٹک ملک کی تمام ریاستوں کے مقابل ترقی کے میدان میں پیش پیش رہے۔