بی جے پی الزام عائد کرنے سے پہلے سی اے جی رپورٹ کاجائزہ لے: سدرشن
بنگلورو،10؍دسمبر(ایس او نیوز) کے پی سی سی نائب صدر قانون سازکونسل کے سابق چیرمین وی آر سدرشن نے کہاکہ بی جے پی رہنما ؤں کو سابق وزیراعلیٰ سدارامیا کے دورمیں 35ہزار کروڑ روپئے کاگھپلہ ہونے کالزام لگانے سے پہلے سی اے جی رپورٹ کاجائزہ لینا چاہئے ۔
کے پی سی سی دفترمیں طلب کردہ اجلاس سے خطاب کرتے ہوئے سدرشن نے اس خیال کااظہارکیا اور کہاکہ حکومت میں کسی بھی طریقہ سے رقم کے غیرقانونی استعمال کاجائزہ لینے کمپٹرولر اینڈ آڈیٹر جنرل ( سی اے جی) کمیٹی قائم کی گئی ہے۔ انہوں نے کہاکہ بی جے پی رہنما آراشوک ہی اس کمیٹی کے صدر ہیں اس لئے بی جے پی رہنما الزامات عائد کرنے سے پہلے کمیٹی کی رپورٹ کامکمل جائزہ لیں اورمزید ایک کمیٹی تشکیل دینے کامطالبہ ترک کریں۔
انہوں نے الزام لگایاکہ بی جے پی سی اے جی رپورٹ کے تحت کتابچہ جاری کرکے سیاسی فائدہ اٹھانے کی کوشش کررہی ہے اور ایڈی یورپا ،جگدیش شٹر جیسے تجربہ کار رہنماؤں کے صلاح مشورہ کے بغیر سی ٹی روی جیسے رہنماعوام کوگمراہ کررہے ہیں۔ انہوں نے بتایاکہ خرچ واخراجات کے تعلق سے متعلقہ محکمہ جات کے افسروں کی جانب سے مالی سال کے دوران رپورٹ جاری کرنے میں تاخیر سے اس طرح کے بے قاعدگیاں ہوتی ہیں لیکن اس کو بہانہ بناکر بی جے پی عوام کو گمراہ کررہی ہے۔
اس موقع پر خطاب کرتے ہوئے رکن کونسل رضوان ارشد نے بتایاکہ وزیراعظم نریندرمودی نے انتخابی جلسوں سے خطاب کے دوران اے آئی سی سی کی سابق صدرسونیا گاندھی کوبیوہ پکارکر ان کے جذبات کوٹھیس پہنچائی ہے۔ انہوں نے کہاکہ سونیا گاندھی کس لئے بیوہ ہوئیں یہ تمام ہندوستانی جانتے ہیں اورملک کی خاطر کسی قسم کی قربانی نہ دینے والے مودی نے سونیاگاندھی کے تعلق سے ناشائستہ الفاظ کااستعمال کرتے ہوئے ملک بھرکے خواتین کی بے حرمتی کی ہے۔