بنگلورو۔19؍دسمبر(ایس او  نیوز) بلگاوی کے سورنا سودھا میں جاری لیجسلیچر کے سرمائی اجلاس کا اب جبکہ صرف ایک ہی دن باقی رہ گیا ہے، اجلاس کی کارروائیوں کے تئیں بیشتر اراکین اسمبلی کی عدم دلچسپی صاف ظاہر ہونے لگی ہے۔ حکمران کانگریس جے ڈی ایس اتحاد کے اراکین کی تعداد آج ایوان میں غیر معمولی طور پر کم رہی، حالانکہ کل ہی بلگاوی میں کانگریس لیجسلیچر پارٹی میٹنگ کا اہتمام کیاگیا لیکن اس کے باوجود بھی آدھے سے زائد کانگریس اراکین اسمبلی آج ایوان سے غیر حاضر رہے۔

کل سی ایل پی میٹنگ میں شریک اراکین میں سے بھی بہت سارے اپنے اپنے حلقوں کا رخ کرچکے تھے۔ بی جے پی لیڈر کے ایس ایشورپانے ایوان میں اراکین کی کمی کے مسئلے پر نشاندہی کرائی اور کہا کہ اگر صورتحال یہی رہی تو ایوان میں حکومت اقلیت میں آسکتی ہے۔ تخمینوں پر بحث کے دوران کل اپوزیشن کے مقابل حکمران اتحاد کے اراکین کی تعداد کم رہی۔ تاہم ان تخمینوں کو اتفاق رائے سے منظور کرالیا گیا۔ اس پر وزیر برائے پارلیمانی امور کرشنا بائرے گوڈا نے بی جے پی کے تعاون پر اس کا ایوان میں شکریہ ادا کیا اور امید ظاہر کی کہ دیگر اہم معاملوں پر بھی حکومت کو اپوزیشن کا تعاون ملتا رہے گا۔