12اپریل کو طلب کیا گیا کرناٹک بند منسوخ
بنگلورو، 10؍اپریل(ایس او نیوز) کاویری نگرانی بورڈ قائم کرنے کے مطالبے پر زور دینے کے لئے تملناڈو کی طرف سے حال ہی میں کئے گئے ریاست گیر بند کا جواب دینے کے لئے 12اپریل کو کنڑا وکوٹا نے کرناٹک بند منانے کی جو آواز دی تھی وہ واپس لے لی گئی ہے۔ کنڑا وکوٹا کے صدر واٹال ناگراج نے ایک اخباری کانفرنس سے مخاطب ہوکر یہ اعلان کیا۔ انہوں نے کہاکہ اس دن کاویری مسئلے پر حکومت کو متوجہ کرانے کے لئے بند منانے کی بجائے راج بھون کا گھیراؤ کرکے احتجاج کیاجائے گا۔ واٹال ناگراج نے کہاکہ کسی بھی حال میں کرناٹک کے عوام کاویری نگرانی بورڈ کے قیام کو منظور نہیں کریں گے۔ سپریم کورٹ نے بھی اس طرح کا بورڈ قائم کرنے کا کوئی مشورہ نہیں دیا ہے۔ اس دوران ایک آرٹی آئی کارکن امیش نے واٹال ناگراج پر انتخابی ضابطے کی پامالی کا الزام لگایا اور کہاکہ چامراج نگر اسمبلی حلقے سے انتخابی میدان میں اترنے والے واٹال ناگراج نے اپنے سیاسی فائدے کے لئے 12؍ اپریل کو کرناٹک بند کا اعلان کیاتھا۔اسی لئے اس بند پر الیکشن کمیشن روک لگائے اور ان کے خلاف انتخابی ضابطہ پامال کرنے مقدمہ درج کرے۔