بی جے پی کی طرف سے کرناٹک بند کا اعلان کئے جانے پر کانگریس نے ڈی جی پی سے کی یڈی یورپا کے خلاف شکایت
بنگلور 27/مئی (ایس او نیوز) ریاستی بی جے پی صدر بی ایس یڈی یورپا کی طرف سے کل پیر کو کرناٹک بند کا اعلان کئے جانے پر کرناٹک پردیش کانگریس کمیٹی کی لیگل سیل نے ریاستی ڈائرکٹوریٹ جنرل آف پولس (ڈی جی پی) سے شکایت کی ہے جس میں کہا گیا ہے کہ عدالت کی طرف سے ریاست بند کا کوئی پرویزن نہیں ہونے کے صاف احکامات ہونے کے بائوجود یڈی یورپا نے کل پیر 28 مئی کو کرناٹک بند کا اعلان کیا ہے۔
سکریٹری آف لیگل سیل سوریا مکندراج نے سنیچر کو شکایت سونپتے ہوئے کہا ہے کہ یڈی یورپا کی جانب سے ریاست گیر سطح پر بند کا اعلان کرنا سپریم کورٹ کے احکامات کی کھلی خلاف ورزی ہے۔
ریاست کیرالہ میں جیمس مارٹن کے کیس کا حوالہ دیتے ہوئے سوریا مکندراج نے بتایا ہے کہ سپریم کورٹ نے صاف طور پر کہا ہے کہ کسی کو بھی بند کا اعلان کرنے کی اجازت نہیں ہے۔ انہوں نے اس بات کا بھی حوالہ دیا ہے کہ حال ہی میں جب کنڑا کارکن وٹھل ناگراج نے اس طرح کے بند کا اعلان کیا تھا تو عدالت نے کہا تھا کہ اس طرح کا بند کال کرنا غیر قانونی ہے۔
سوریا مکندراج نے ڈی جی پی سے یڈی یورپا کے خلاف قانونی کاروائی کرنے کا مطالبہ کیا ہے۔
اُدھر دوسری طرف یڈی یورپا نے وضاحت پیش کرتے ہوئے کہا ہے کہ بی جے پی نے احتجاجی بند کا کوئی کال نہیں دیا ہے۔ ان کے مطابق کسانوں نے اپنا قرضہ معاف نہیں کئے جانے کو لے کر پیر کو کرناٹک بند کا اعلان کیا ہے، اخبارنویسوں سے گفتگو کرتے ہوئے یڈی یورپا نے بتایا کہ بی جے پی ریاست گیر سطح پر اُن کے بند کو کامیاب کرنے صرف اُن کسانوں کو اپنا تعائون پیش کرے گی۔ انہوں نے یہ بھی کہا کہ انتخابات ہونے والے راجا راجیشوری نگر اسمبلی حلقہ کو چھوڑ کر پوری ریاست میں بند منایا جائے گا۔ انہوں نے اپنی بات کو دھراتے ہوئے کہا کہ یہ بند بی جے پی کی طرف سےکال نہیں کیا گیا ہے۔