بنگلورو،18؍اپریل(ایس او نیوز) ریاست کرناٹک میں 12؍مئی کو اسمبلی کے لئے ہونے والے انتخابات کے پیش نظر 97037 ہتھیارات میں سے 94,345ہتھیارات متعلقہ پولیس تھانوں میں جمع کئے گئے ہیں۔جبکہ 50ہتھیارات ضبط کرکے 6ہتھیاروں کے لائسنس منسوخ کردئے ہیں ۔ ریاست میں اب تک مجرمانہ پس منظر رکھنے والے 12,944؍افراد کو حراست میں لیا گیا ہے جبکہ 24717؍افراد کے خلاف غیر ضمانتی وارنٹ جاری کئے گئے ہیں ۔ریاست میں مجموزہ اسمبلی انتخابات کو دھاندلیوں سے پاک ، آزاد اور منصفانہ یقینی بنانے احتیاطی طور پر یہ اقدامات کئے جارہے ہیں۔ ایک سینئر پولیس افسر نے بتایاکہ انتخابات کے لئے ریاست میں سخت سکیورٹی انتظامات کئے گئے ہیں ۔ انتخابی ضابطہ اخلاق پر سختی سے عمل کرنے فلائنگ اسکواڈس تشکیل دئے گئے ہیں۔اس وقت ریاست میں 1,156؍فلائنگ اسکواڈ اور1255اسٹاٹک سرویلنس ٹیموں کوتعینات کیا گیا ہے ۔ضابطہ اخلاق کی خلاف ورزی کرنے والوں کے خلاف کارروائی کرتے ہوئے دیواروں پر چسپاں12,539ہینڈ بیلس17,693پوسٹرس اور 7,711بینرس عوامی مقامات سے ہٹائے گئے ہیں ۔اس کے علاوہ پچھلے 24گھنٹوں میں 24,04,400 روپئے نقد تین موٹر گاڑیاں56 ساڑیاں ،1150گاڑیوں کے اسٹرائکرس اور 1200 گھریلو سازو سامان ضبط کرلئے گئے ہیں ۔اب تک کل 21,24,68,980 روپئے نقد،1,76,80,000روپئے مالیت کا7کلو 503گرام سونا، 11,47,200روپئے کی چاندی اور دیگر اشیاء ضبط کی گئی ہیں ۔