کرناٹک اسمبلی انتخابات عوام کے انتخابی حقوق کی تشہیر کیلئے کھلاڑیوں کی خدمات
بنگلورو،31؍جنوری(ایس او نیوز) ریاست میں اسمبلی انتخابات کی تاریخیں قریب ہوتی جا رہی ہیں اور اسی دوران مرکزی انتخابی کمیشن نے یہ فیصلہ کیا ہے کہ عوام میں اپنے انتخابی حقوق سے متعلق بیداری پیدا کرنے کے لئے اختراعی اوردلچسپ تشہیری طریقوں کو اختیار کیا جائے گا۔دلچسپ بات یہ ہے کہ انتخابی کمیشن نے مختلف میدانوں کے عمائدین و قائدین سے رجوع کیا ہے ، جو کہ عوام پر قابل قدر اثرات مرتب کرسکتے ہیں اور اب کی بار فلمی دنیا کے مشہور اداکاروں کو اس سلسلہ میں نظر انداز کر دیا گیا ہے۔ذرائع کے مطابق اس سے پہلے کئی مواقع پر انتخابی کمیشن نے عوام میں انتخابات سے متعلق بیداری پیدا کرنے کے لئے فلمی دنیا کے معروف اداکاروں کی خدمات حاصل کی تھیں،ایسے ہی ایک موقع پر ایک مشہور اداکار نے انتخابی تشہیر کی خدمات انجام دی تھی لیکن پولنگ کے دن خود انہوں نے اپنا حق رائے دہی استعمال نہیں کیا تھا، جس کی وجہ سے انتخابی کمیشن نے اب کی بار زیادہ احتیاط برتنے کا فیصلہ کیا ہے۔یہ بھی فیصلہ کیا گیا ہے کہ اس مرتبہ کھیل کے شعبہ سے جڑی ہوئی معروف شخصیات اور خاص طور پر معذوروں کے اولمپک مقابلوں میں شریک یا وہاں سے اعزاز یافتہ کھلاڑیوں کو زیادہ اہمیت دی جائے۔ اب کی بار طباعتی اور برقی ذرائع ابلاغ میں انتخابی کمیشن کی طرف سے جاری کئے جانے والے اشتہارات حکومت کے سابقہ روایتی انداز سے بالکل مختلف ہونگے اور انہیں دلچسپ انداز میں لوگوں کی توجہ حاصل کرنے کے قابل بنایا جائے گا۔اس کے علاوہ انتخابی کمیشن نے یہ بھی فیصلہ کیا ہے کہ بنگلور ون اور کرناٹک ون میں جو رسیدیں فراہم کی جاتی ہیں ان کے پچھلے حصہ میں عوام کے لئے بیداری پیغامات کی طباعت بھی ہوگی، واضح رہے کہ اس وقت شہر میں 140 بنگلورون کے مراکز موجود ہیں جبکہ ریاست بھر میں کرناٹک ون مراکز کی تعداد 45 ہے۔انتخابی کمیشن کے ذرائع کا کہنا ہے کہ ان دونوں ہی مراکز میں ریاست بھر میں روزانہ ایک لاکھ سے زیادہ رسیدیں تقسیم کی جاتی ہے، انتخابی کمیشن دوسری سرکاری رسیدوں کو بھی اس مقصد کے لئے استعمال کرنے پر غور کر رہا ہے۔