بنگلورو،29؍جنوری(ایس او نیوز) ریاستی وزیر برائے داخلہ امور رام لنگاریڈی نے آج یہ کہتے ہوئے ایک بم گرایا ہے کہ بشمول اترپردیش دیگر ریاستوں میں مسلمانوں کے ووٹوں کو تقسیم کرنے کے بعد اب اس حکمت عملی کو کرناٹک میں استعمال کرنے بھارتیہ جنتا پارٹی (بی جے پی) نے پاپولرفرنٹ آف انڈیا (پی ایف آئی) اور سوشیل ڈیموکرٹک پارٹی آف انڈیا (ایس ڈی پی آئی) جیسی تنظیموں کے ساتھ معاہدہ کرلیاہے۔

انہوں نے بتایاکہ حیدرآباد کے مسلم لیڈر اسدالدین اویسی کے ساتھ بی جے پی کا سمجھوتہ نئی بات نہیں۔ اسی طرح اب کرناٹک میں مسلمانوں کے ووٹوں کو تقسیم کرنے بی جے پی نے پی ایف آئی اور ایس ڈی پی آئی کے ساتھ ایک خفیہ معاہدہ کیاہے۔ اس ضمن میں ضروری دستاویزات جاری کی جائیں گی۔

ان سے پوچھا گیا کہ کانگریس پر یہ الزام ہے کہ سدارامیا خود سماج کو تقسیم کرنے کی کوشش کررہے ہیں تو اویسی کے ساتھ بی جے پی کے سمجھوتہ کا معاملہ کہاں تک سچ ہوسکتاہے۔ ریڈی نے بتایاکہ اترپردیش اور مہاراشٹرا میں بی جے پی نے اویسی ہی کو استعمال کرکے مسلمانوں کے ووٹوں کو تقسیم کردیا تھا۔ اب ایسا ہی کام ریاست کرناٹک میں کرنے کے لئے بی جے پی اور اویسی کے درمیان حیدرآباد میں ایک معاہدہ کیاگیاہے۔

ابتدا میں نامہ نگاروں سے بات کرتے ہوئے وزیر داخلہ امور رام لنگا ریڈی نے کہاکہ کرناٹک میں انتخابات سے متعلق بی جے پی اور اویسی کے درمیان ہوئے معاہدہ کی اطلاع انہیں ملی ہے۔ انہوں نے الزام لگایاکہ اقتدار کے لئے بی جے پی کسی بھی طبقہ کے ساتھ معاہدہ کرسکتی ہے۔ اس طرح کا معاہدہ کرکے بی جے پی اترپردیش میں اقتدار حاصل کرنے میں کامیاب رہی۔ اب بشمول کرناٹک مختلف ریاستوں میں اس طرح کی حکمت عملی کرنے کی سازش جاری ہے۔

انہوں نے دعویٰ کیا کہ کرناٹک میں آئندہ اسمبلی انتخابات میں کامیابی حاصل کرنے پی ایف آئی اور ایس ڈی پی آئی کے ساتھ بی جے پی معاہدہ کررہی ہے۔ اس سلسلہ میں ان کے پاس دستاویزات ہیں۔ ضرورت پڑنے پر ان دستاویزات کو جاری کیا جائے گا۔ انہوں نے بتایاکہ کانگریس نے کبھی بھی ایسی تنظیموں کے ساتھ کوئی سمجھوتہ یا معاہدہ کیا ہی نہیں۔ انہوں نے بتایاکہ سماج میں افواہ پھیلاکر سیاسی فائدہ اٹھانے میں بی جے پی ماہر ہے۔