کرناٹکا میں اسمبلی انتخابات کی تاریخ کا اعلان 23 مارچ کو کئے جانے کا امکان
بنگلورو۔19؍مارچ(ایس او نیوز) ریاست کے سیاسی اور سرکاری حلقوں میں الیکشن کمیشن کی طرف سے کرناٹکا اسمبلی انتخابات کی تاریخ کا اعلان 23 مارچ کو کئے جانے کا اندازہ لگایا گیا ہے، جس کے لئے بڑے پیمانے پر تیاریوں کا آغاز ہوچکا ہے۔ ذرائع سے ملی اطلاع کے مطابق الیکشن کمیشن کی تیاریوں کے کو دیکھتے ہوئے ریاست میں 7اور13 مئی کے درمیان ایک دن پولنگ کرائی جاسکتی ہے۔
23 مارچ کو الیکشن کمیشن کی طرف سے تاریخوں کے اعلان کے ساتھ ہی ریاست میں انتخابی ضابطہ اخلاق بھی لاگو ہوجائے گا۔ تاریخوں کے اعلان سے قبل آنے والے ایک دو دنوں میں چیف الیکشن کمشنر او پی راوت کرناٹک کا دورہ کریں گے اور اعلیٰ افسران کے ساتھ صورتحال کا جائزہ لیں گے۔ اس مرحلے میں وہ اعلیٰ پولیس حکام کی ایک الگ میٹنگ کرکے نظم وضبط کی صورتحال کا بھی جائزہ لیں گے۔ 23مارچ کو راجیہ سبھا انتخابات ہوں گے اور اسی دن او پی راوت نے دہلی میں کرناٹک کے انتخابات کی تاریخوں کے اعلان کیلئے اخباری کانفرنس طلب کرنے کا بھی فیصلہ کیا ہے۔ اوپی راوت اپنے دورۂ کرناٹک کے دوران انتخابی ضابطے کے سختی سے نفاذ پر بھی حکام سے بات چیت کریں گے۔ 23مارچ کو انتخابات کی تاریخ کے اعلان کے ساتھ ہی 45 دنوں تک انتخابی ضابطہ لاگو رہے گا۔ الیکشن کمیشن کی طرف سے واضح اشاروں کے ساتھ تمام سیاسی جماعتوں نے انتخابات کی تیاریوں کا آغاز بھی کردیا ہے۔ 13مئی کو کرناٹک اسمبلی انتخابات کا پانچ سالہ عرصہ مکمل ہوجائے گا، جبکہ اسمبلی کی میعاد 28مئی کو پوری ہوگی۔ 29مئی سے قبل ریاست میں نئی حکومت کی تشکیل ہوجانی چاہئے۔ الیکشن کمیشن نے ریاست میں جاری ایس ایس ایل سی امتحانات کی تاریخوں کا بھی جائزہ لیا ہے۔ ان امتحانات کے فوراً بعد انتخابات کی تیاریوں کو بڑے پیمانے پر آگے بڑھایا جائے گا۔ سیاسی پارٹیوں نے اپنے اپنے اراکین اسمبلی کو ہدایت دے دی ہے کہ 23مارچ سے قبل اپنے حلقوں میں باقی تمام ترقیاتی کام پورے کرلیں۔ الیکشن کمیشن کی تیاریوں کے ساتھ ہی واضح اشارے مل رہے ہیں کہ انتخابات کو ملتوی کرنے کا سوال ہی نہیں اٹھتا۔ حالانکہ قیاس کیاجارہاتھا کہ مرکزی حکومت انتخابات کو ٹالنے کی کوششیں کررہی ہے، لیکن ایسا نہیں لگتا کہ الیکشن کمیشن اس کے دباؤ میں آئے گا۔