ریاست میں کانگریس کو اقتدار صد فیصد یقینی:ویرپا موئیلی
بنگلورو۔18؍اپریل(ایس او نیوز) سابق وزیر اعلیٰ اور ریاستی کانگریس انتخابی منشور کمیٹی کے چیرمین ڈاکٹر ایم ویرپا موئیلی نے یقین ظاہر کیا ہے کہ ریاست میں کانگریس واضح اکثریت کے ساتھ اقتدار پر برقرار رہے گی۔ پی ٹی آئی کو دئے گئے انٹرویو میں انہوں نے کہاکہ ریاست میں بی جے پی کے مقابل کانگریس کی صورتحال کافی بہتر ہے۔ ساتھ ہی ریاست میں کسی طرح کی مودی لہر نہیں ہے،کیونکہ وزیراعظم مودی نے ملک کے عوام سے جو بھی وعدہ کیا تھا اسے پورا نہیں کرپائے، عوام جان چکے ہیں ان کاہر وعدہ انتخابی جملہ ہوتاہے۔ پچھلے پانچ سال کے دوران ریاست میں کانگریس حکومت نے بہترین کارکردگی کی ہے۔ ریاست میں کہیں بھی حکمران مخالف رجحان نہیں پایا جاتا، جس کا بھرپور فائدہ کانگریس پارٹی اٹھانے والی ہے۔ انہوں نے کہاکہ کوئی بھی انتخاب کسی سیاسی جماعت کے لئے آسان نہیں ہوتا،اس میں کامیابی کے لئے جدوجہد کرنی پڑتی ہے کانگریس پارٹی اس جدوجہد میں کسی سے پیچھے نہیں رہے گی۔ انتخابات کے بعد معلق اسمبلی کی صورت میں کانگریس جنتادل (ایس) مفاہمت کے امکان کو مسترد کرتے ہوئے ڈاکٹر موئیلی نے کہاکہ 2004میں کانگریس جنتادل (ایس) سے اتحاد کا تلخ تجربہ آزما چکی ہے، اب دوبارہ یہی تجربہ دہرانے کی حماقت نہیں کرے گی۔ انہوں نے کہا کہ ریاست کے اقتدار پر قابض ہونے کا دعویٰ کرنے والی بی جے پی ایسے امیدواروں کو میدان میں اتارنے پر آمادہ ہے جو مختلف کیسوں میں جیل کی ہوا کھاچکے ہیں یا پھر ان پر رشوت خوری کے سنگین الزامات ہیں۔ انہوں نے کہاکہ بی جے پی نے ریاست کے سیاسی ماحول کو بلاری حلقے سے جناردھن ریڈی کے بھائی سوم شیکھر ریڈی کو میدان میں اتارکر پراگندہ کردیا ہے۔ شہر کے شانتی نگر اسمبلی حلقے سے موجودہ رکن اسمبلی این اے حارث کو میدان میں اتارے جانے کی تصدیق کرتے ہوئے ڈاکٹر موئیلی نے کہاکہ حال ہی میں این اے حارث کے فرزند محمد نلپاڈ کی طرف سے ایک نوجوان پر حملے کے واقعے کو بنیادبناکر ان کے خلاف احتجاج کی لہر چلائی گئی تاہم پارٹی نے اپنے طور پر ان کے حلقے میں کامیابی کے امکانات کا جائزہ لیاتو یہی نتیجہ سامنے آیا کہ حارث ہی ایسے امیدوار ہیں جو اس حلقے میں کامیاب ہوسکیں گے۔ رائچور میں سابق رکن اسمبلی سید یٰسین کو ٹکٹ دینے کے متعلق ایک سوال پر ڈاکٹر موئیلی نے کہاکہ یٰسین اب صحت مند نہیں ہیں یہاں تک کہ چل پھر بھی نہیں سکتے۔ اسی لئے پارٹی ان کی جگہ پر کسی اور کو ٹکٹ دینے پر غور کررہی ہے۔