بنگلورو7فروری (ایس او نیوز) 8فروری بروز جمعہ پیش کئے جارہے ریاستی بجٹ میں آنگن واڑی کارکنوں نے مطالبات پر توجہ دینے کی یقین دہانی کے بعد آنگن واڑی ورکرس نے اپنا احتجاج واپس لے لیا ۔ ریاستی وزیر برائے بہبودی خواتین واطفال جئے مالا کی طرف سے بھروسہ دلائے جانے کے بعد احتجاج واپس لینے پر آنگن واڑی کارکن راضی ہوئے ۔لیبر ایکٹ جاری کرنے مساوی کام ، مساوی تنخواہ کے اصرار کے سا تھ ریاستی آنگن واڑی ورکرس و معاونین کی تنظیم کی زیر قیادت فریڈم پارک میں کل رات سے احتجاج جاری تھا۔بروز منگل جئے مالاکی طرف سے مطالبات کی تکمیل کا بھروسہ دلانے پر ہڑتال واپس لی گئی ۔ غیر معینہ مدت کی ہڑتال کے مقام پر کارکنوں سے انہوں نے کہا کہ ریاست کی لڑکیوں کی حفاظت کی ذمہ داری آنگن واڑی کارکنوں نے اپنے کندھوں پر لی ہے ۔ نہ صرف محکمہ آپ کی حمایت میں ہے بلکہ میں بھی ایک خاتون کی حیثیت سے آپ کے ساتھ ہوں ۔ بجٹ میں آپ کے کئی مطالبات کی تکمیل ہوگی ۔ سابق اور موجودہ مخلوط حکومت آپ پر توجہ دیتی آرہی ہے ۔

انہوں نے افسوس کا اظہار کرتے ہوئے کہاکہ مساوی کام مساوی تنخواہ کے مطالبہ سے متعلق مرکزی اور ریاستی حکومتیں دونوں مل بیٹھ کر تبادلہ خیال کریں تو مسئلہ حل ہوسکتا ہے۔ مرکزی حکومت اسکیمیں جاری کرتی ہیں اور ریاستی حکومت کے کندھے پرڈال دیتی ہے ۔ لیکن امدادی رقم جاری نہیں کرتی ۔ آپ کا مطالبہ ہے کہ5ہزار روپئے پنشن دی جائے ۔ یہ ایک مالیاتی بوجھ کا مسئلہ ہے اس سلسلہ میں وزیراعلیٰ کے ساتھ بات چیت کروں گی ۔ منی آنگن واڑی کو ترقی دیتے ہوئے اس کے درجہ میں اضافہ کرنے کی کارروائی شروع ہوگئی ہے ۔ دس سال سے زیادہ مدت خدمات انجام دینے والے آنگن واڑی کارکنوں کو محکمہ میں ملازمت فراہم کرنے کے سلسلہ میں غور کیا جارہا ہے ۔ حاملہ خواتین کو غذا فراہم کرنے کی خدمت پر تبصرہ کرتے ہوئے جئے مالا نے کہا کہ یہ ایک اچھا اور نیکی کا کام ہے ۔ اس پر عدم اطمینان کا اظہار نہ کریں ۔ مجھے معلوم ہے کہ یہ کام انتہائی مشکل ہے ۔ آپ پہاڑی علاقوں میں واقع حاملہ خواتین کو بھی تغذیہ بخش غذا پہنچاتے ہیں ۔ وہاں سنٹر نہیں جاسکتا ۔

ریاستی آنگن واڑی ورکرس کی صدر جئے لکشمی نے کہا کہ ریاستی حکومت امسال کے بجٹ میں ان کے مطالبات پورے کرنے کابھروسہ دیا ہے ۔ اس لئے احتجاج واپس لیا گیا ہے۔ بجٹ میں ہمارے مطالبات کی تکمیل نہیں کی گئی تو قانونی جدوجہد کے ساتھ مہینہ بھر رات دن احتجاج کیا جاتا رہے گا۔