اے سی بی کے چھاپوں میں دو بدعنوان افسران بے نقاب، کروڑوں روپیوں کی نقد رقم، اثاثے اور قیمتی اشیاء برآمد
بنگلورو،5؍اکتوبر(ایس او نیوز) کرناٹکا انڈسٹریل ایریا ڈیولپمنٹ بورڈ کے چیف ڈیولپمنٹ افسر ٹی آر سوامی اور بنگلور ڈیولپمنٹ اتھارٹی کے آفیسر انجینئر ایل جی گوڈیا کے دفتر اور دیگر ٹھکانوں پر انسداد کرپشن بیورو کی ٹیموں نے بیک وقت چھاپے مارے اور ان کے پاس سے پانچ کروڑ روپیوں سے زیادہ کی نقد رقم کے علاوہ بیرونی ممالک کی کرنسی پر مشتمل قطیر رقم ، اثاثوں کے دستاویزات اور قیمتی ساز وسامان وغیرہ برآمد کیا۔ سوامی اور گوڈیا کے گھر وں اور دفاتر سمیت آٹھ مقامات پر اے سی بی کی ٹیموں نے چھاپے مارے اور افسروں نے بتایاکہ ان دونوں کے پاس سے جو رقم ضبط کی گئی ہے، دیر شام تک بھی اس کی گنتی پوری نہ ہوسکی۔ سوامی اور گوڈیا کے خلاف آمدنی کے ذرائع سے زیادہ املاک رکھنے کی شکایات کے بعد ابتدائی جانچ کے ذریعے جو معلومات اکھٹا کی گئیں ان کی بنیاد پر اے سی بی کی ٹیموں نے آج ان دونوں کو نشانہ بنایا ۔ بتایاجاتاہے کہ کے آئی اے ڈی بی میں چیف ڈیولپمنٹ افسر کے عہدے پر فائز سوامی نے ملیشورم کے منتری گرین اپارٹمنٹ میں عالیشان فلاٹ خریدا تھا اور وہیں پر مقیم تھا۔ اے سی بی کی ٹیم جب اسے پکڑنے کے لئے جب اس کے فلاٹ پر پہنچی تو اس نے کافی دیر تک دروازہ نہیں کھولا۔ اس سے پہلے کہ اے سی بی ٹیم فلاٹ میں داخل ہوتی اس نے عقبی دروازے سے دستاویزات رقم وغیرہ کہیں اور پہنچا دی ہے۔ اس کے باوجود بھی اس کے فلاٹ سے کروڑوں روپیوں کی رقم ضبط کی گئی۔ ان دستاویزات اور رقم کو آٹو رکشا میں کہیں اور لے جانے کے لئے اپارٹمنٹ کے پاس کھڑے ہوئے ایک شخص کو بھی اے سی بی نے تحویل میں لے لیا ہے۔ اے سی بی افسروں نے بتایاکہ سوامی کے گھر سے جتنے نوٹ برآمد ہوئے ہیں ان کو گننا دشوار محسوس ہونے لگا تو نوٹ گننے کی مشینیں منگوائی گئیں اس کے باوجود بھی گنتی پوری نہ ہوسکی۔ اے سی بی کے انسپکٹر جنرل آف پولیس چندر شیکھر نے بتایاکہ کھنیجا بھون میں سوامی کے دفتر کے علاوہ شہر میں اس کے دیگر رشتہ داروں کے گھر وں پر بھی چھاپے مارکر کئی اثاثوں کے دستاویزات برآمد کئے گئے ۔ گوڈیا کے بی ڈی اے میں موجود دفتر کے علاوہ شہر میں اس کے مکان اور گبی میں اس کے فارم ہاؤز پر چھاپے مارے گئے اور وہاں پر 50لاکھ سے زیادہ کی نقد رقم ، کئی کلوسونا اور دیگر بیش قیمتی اشیاء ضبط کی گئیں۔ بتایاجاتاہے کہ گوڈیا ہاؤزنگ کنٹراکٹروں سے کروڑوں روپے بطور کمیشن وصول کرتا، کئی برسوں سے یہ اپنے اثر ورسوخ کی بدولت بی ڈی اے میں متعین تھا۔بنگلور کے اے سی بی ایس پی سنجیو پاٹل کی نگرانی میں 100افراد پر مشتمل ٹیموں نے ان دونوں افسروں کے ٹھکانوں پر چھاپے مارے۔