کارکلا میں پیش آئی ڈکیتی کی واردات۔مکینوں پر حملہ کرکے لوٹے گئے لاکھوں روپے نقد او ر زیورات
کارکلا4؍فروری (ایس او نیوز) بنگلے گُڈّے نامی علاقے میں رات کے وقت لٹیروں نے ایک گھر میں گھس کر مکینوں پر حملہ کیا اور لاکھوں روپے کے زیورات لوٹ لیے۔ موصولہ رپورٹ کے مطابق لوٹے گئے گھر میں سنجیو نائک اور یشودا نامی میاں بیوی رہتے تھے۔ آدھی رات کو اس گھر کا پچھلا دروازہ توڑ کر تین لٹیرے ان کے گھر میں داخل ہوئے اور تیز دھار والے ہتھیار دکھاکر نہ صرف مار پیٹ کی بلکہ تکیوں سے ان کے منھ سے بند کرتے ہوئے دھمکی دی کہ اگر شور مچایا تو جان سے مارڈالیں گے ۔
لٹیروں نے پورے گھر کی تلاشی لیتے ہوئے جہاں سے بھی سونے کے زیور ات ملے وہاں سے اٹھا لیے۔لوٹے گئے زیورات کا وزن 168گرام بتایا جاتا ہے۔ اس کے علاوہ 2.5لاکھ روپے نقد اور قیمتی موبائل فون بھی لٹیرے اڑالے گئے۔ ڈکیتی کا شکار ہونے والے میاں بیوی نے بتایا کہ لٹیرے کنڑا اور تُلو میں بات چیت کررہے تھے۔حملے میں زخمی ہونے والے ریٹائرڈ بینک ملازم سنجیو نائک کو علاج کے لئے اسپتال میں داخل کیا گیا ہے۔سنجیو نائک کی بیوی یشودا نائک بی ایس این ایل میں ملازم ہے۔ ان کا بیٹا اور بہو بیرونی ملک میں رہائش پزیر ہیں اس لئے گھر پر میاں بیوی دونوں ہی رہتے ہیں۔سمجھا جاتا ہے کہ اس تنہائی کا فائدہ اٹھاتے ہوئے منصوبہ بند طریقے سے ڈکیتی کی کارروائی انجام دی گئی ہے۔
ڈکیتی کی خبر ملنے پر اے ایس پی رشی کیش سوناونے، کارکلا سرکل انسپکٹر جوائے اینتھونی، ٹاؤن پی ایس آئی ننجا نائک نے جائے واردات پر پہنچ کر معائنہ کیا۔کیس درج کرنے کے بعد فنگر پرنٹس کے ماہرین اور ڈاگ اسکواڈ طلب کرکے تحقیقات کا آغاز کیا گیا ہے۔