اُڈپی 28/اپریل(ایس اؤنیوز) کانتاور بالے ہتلو کی سریکھا پجاری (28)کو جان سے مارنے کی دھمکی دینے اور اُسےخودکشی کے لئے اُکسانے کےالزام میں شری رام سینا کے ایک کارکن سمیت 3 لوگوں کو کارکلا پولس نے گرفتارکرلیا ہے۔
گرفتارشدہ ملزموں کی شناخت کارکلا شری رام سینا کا اہم کارکن روشن کوٹیان(26)، مہلوکہ سریکھا کے شوہر کا بھائی سنتوش امین، اُس کی بیوی شوبھا (25)اور شوہر کی بڑی بہن بھارتی (38) کی حیثیت سے کی گئی ہے۔ موڈبیدرے ،کوٹے باگیلوکے مکین سنجیو سورنا کی بیٹی سریکھا کی شادی 5سال قبل کانتاور کے پرکاش کے ساتھ ہوئی تھی ۔ سریکھا اپنے 4سالہ بچے کے ساتھ اپنے شوہر کے گھر کانتاور میں مقیم تھی، 25اپریل کی سہ پہر 2 بجے گھر کے قریب ہی واقع ایک درخت سے لٹک کر خودکشی کی کوشش کرنے والی سریکھا نے، آلواس اسپتال لے جانے کے دوران دم توڑ دیا تھا۔ سریکھا کی موت کو لے کر اس کا بھائی سریش پجاری نے شبہ ظاہر کرتے ہوئے کارکلا دیہی پولس تھانے میں واقعے کی چھان بین کرنے شکایت درج کرائی تھی۔
سریکھا کی موت کے بعد جب منی پال کے کے ایم سی اسپتال میں پوسٹ مارٹم کیا جارہاتھاتو اس کے کپڑوں میں ایک ڈیتھ نوٹ برآمد ہوا۔ جس میں سریکھا نے لکھا تھا کہ ’’ میری موت کے لئے شوبھا، بھارتی اور روشن کی ہراسانی اور اشتعال انگیزی اہم وجہ ہے‘‘ ۔ اس ڈیتھ نوٹ کو دیکھتے ہوئے اور سریکھا کی بہن پشپا کی طرف سے دی گئی شکایت پر کارروائی کرتے ہوئے کارکلا دیہی پولسنے تینو ں کو گرفتارکرلیااور عدالتی تحویل میں بھیج دیا ہے۔
بتایا گیا ہے کہ شوبھا، بھارتی اور روشن کے درمیان جاری ناجائز تعلقات کا آنکھوں دیکھا حال سریکھا نے اپنے شوہر کے سامنے بیان کیا تھا،ان تینوں کو اس کی بھنک لگی، اسی وجہ سے شوبھا اور بھارتی نے کارکلا میں موبائیل دکان چلانےو الے روشن کے ذریعے سریکھا کو جان سے مارنے کی دھمکیاں دینا شروع کردیا۔ تینوں نے سریکھا پر دباؤ بنارکھا تھا اور دھمکی دے رکھی تھی کہ اگر اُن کے ناجائز تعلقات کے بارے میں کسی کو خبر کی تو اُسے ، اس کے شوہر اور بچے سمیت قتل کردیں گے۔ یہ تمام باتیں سریکھا نے اپنے ڈیتھ نوٹ میں تحریر کی ہے۔ اس کے علاوہ جن موبائیل نمبروں سے اس کو دھمکیاں ملتی تھیں وہ نمبر بھی اس میں درج کئے جانے کی اطلاعات موصول ہوئی ہیں۔ اُڈپی ضلع ایس پی بال کرشنا کے حکم کے تحت اُڈپی ڈی وائی ایس پی کمار سوامی کی رہنمائی میں کارکلا پولس تھانہ انسپکٹر جائے انتھونی ، کارکلا دیہی پولس تھانہ انسپکٹر اور عملے نے کارروائی کی ہے۔