کارکلا میں پیش آئی سنسنی خیز واردات۔طلاق دینے کے بدلے شوہر نے کاٹ ڈالے بیوی کے دونوں ہاتھ اور پیر
کارکلایکم ؍فروری (ایس او نیوز)ہرمونڈے کوکوڈاڈی نامی مقام پر ایک سنسنی خیز واردات پیش آئی ہے جس میں بیوی کے طلاق مانگنے پر اس کے شوہر نے اسے جان سے مارنے کی کوشش کی اور تلوار سے دونوں ہاتھ اور پیر کاٹ ڈالے۔
موصولہ رپورٹ کے مطابق سنتوش پجاری(27سال) نامی شوہر کے ہاتھوں سفاکی اور درندگی کا شکار ہونے والی مظلوم خاتون کا نام انوشری پجاری (23سال)ہے جو اس وقت منی پال اسپتال کے انتہائی نگہداشت والے کمرے میں زندگی اور موت کی جنگ لڑ رہی ہے۔ انوشری نے اپنے دور کے رشتے دار سنتوش پجاری سے عشق رچاکر شادی کی تھی۔بتایاجاتا ہے کہ سنتوش میرا روڈ ممبئی کی ایک لاڈج میں منیجر کی ملازمت کرتا ہے جبکہ انوشری نے انجینئرنگ ڈپلوما کیا ہوا ہے۔6جنوری 2017کودونوں کی شادی رجسٹر ہوئی تھی۔
کہتے ہیں کہ انوشری کا بنگلورو میں ملازمت کرنا سنتوش کو پسند نہیں تھااس لئے اس نے انوشری کو ممبئی بلالیا۔ شاید اسی مسئلے پر دونوں میں ان بن بڑھ گئی ۔ انوشری کی ماں سوگونا نے ممبئی جاکر دونوں میں مصالحت کروانے کی کوشش کی جو ناکام رہی اور انوشری اپنے شوہر سے طلاق کا مطالبہ کرتے ہوئے اپنی ماں کے ساتھ واپس اپنے گاؤں آگئی۔
اسپتال میں داخل بری طرح زخمی انوشری کے بیان کے مطابق جب وہ ویران علاقے سے گزر کر ندی پار کرکے اپنے گھر کی طرف جارہی تھی تو سنتوش نے اچانک پیچھے سے آکر اس پر تلوار سے پے در پے حملہ کیا اور اس کے دونوں ہاتھ پیر کاٹ ڈالے۔ اس دوران وہ چیخ رہاتھا کہ تمہیں طلاق دینے سے بہتر ہے کہ جان سے ماردیا جائے۔اجیکر پولیس اسٹیشن میں سنتوش پجاری کے خلاف قتل کی کوشش کا کیس درج کرلیا گیا ہے۔