پڑوسی ریاست کیرالہ کے کنّور میں انٹرنیشنل ائرپورٹ کا شاندار افتتاح؛ کیرالہ واحد ریاست جہاں ہیں چار انٹرنیشنل ائرپورٹ
بھٹکل9دسمبر ( ایس او نیوز) پڑوسی ریاست کیرالہ کے کنّور میں انٹرنیشنل ائرپورٹ کا شاندار افتتاح عمل میں آیا جس کے ساتھ ہی کیرالہ پورے ملک میں واحد ریاست بن گیا جہاں چار انٹرنیشنل ائرپورٹ قائم ہیں۔
صبح دس بجے ایئر انڈیا ایکسپریس نے 180 مسافروں کے ساتھ ابو ظہبی کے لئے پرواز کی، اس موقع پر تمام مسافروں کو ہوائی اڈ ہ کی جانب سے تحفہ بھی پیش کیا گیا۔تروانت پورم ، کوچی اور کنور کے بعد کیرالہ میں یہ چوتھا بین الاقوامی ہوائی اڈہ ہے ۔ ابو ظہبی کے لئے پرواز سے پہلے ایک ثقافتی پروگرام کا انعقاد ہوا جس میں سیاستدانوں سمیت عوام کا ہجوم جمع تھا۔یہاں سے پہلے دن کے لئے دو پروازیں مقرر کی گئی ہیں۔ اس ایئرپورٹ سے متحدہ عرب امارات، عمان، قطر کے علاوہ حیدرآباد، بنگلور اور ممبئی کے لئے بھی گھریلو پروازیں ہوں گی۔
یہ ائیرپورٹ کنّور ٹاون سے 25 کلو میٹر دور مطاّنور میں پبلک۔ پرائیویٹ پارٹنرشپ ماڈل پر 2000 ایکڑ زمین پر تعمیر کیا گیا ہے۔ ائرپورٹ پر 1,892 کروڑ روپیہ کی لاگت آئی ہے جس میں بین الاقوامی سمیت گھریلو پروازوں کے لئے خصوصی ٹرمنل قائم کئے گئے ہیں، چھ ائیرو بریجس، 3,050 میٹر لمبا رن وے تعمیر کیا گیا ہے۔ بتایا گیا ہے کہ ائرپورٹ بھیڑ بھاڑ کے اوقات میں دو ہزار مسافروں کو ہینڈل کرسکے گا۔ اس ائرپورٹ کی تعمیر کے ساتھ ہی ریاست کیرالہ کے کنور اور کاسرگوڈ ضلع کے عوام کے ساتھ ساتھ ریاست کرناٹک کے کورگ ضلع کے عوام بھی فائدہ اُٹھاسکیں گے۔
فی الحال ائیر انڈیا اور گو۔ائیر کی جانب سے فلائٹ سروس شروع کی گئی ہے، مگر جلد ہی دیگر ائرلائنس بھی اس ائرپورٹ پر اپنی خدمات فراہم کرنے کی توقع ہے۔ آج افتتاحی تقریب میں قریب ایک لاکھ افراد ائرپورٹ میں جمع ہوئے تھے جو اپنے دیرینہ خواب کی تکمیل پر نہایت خوش نظر آرہے تھے۔