نجی میڈیکل کالجوں میں کنڑیگاؤں کو650 افزد سیٹیں
بنگلورو،21؍ستمبر(ایس او نیوز) کرناٹکا ایگزامنیشن اتھارٹی نے میڈیکل سیٹوں میں داخلوں کے خواہشمند امیدواروں کے حق میں ایک اہم فیصلہ لیتے ہوئے طے کیا ہے کہ ریاست بھر کے نجی میڈیکل کالجوں میں کنڑیگاؤں کے لئے 650 سیٹیں مختص کی جائیں گی۔
نیشنل یلیجبلیٹی اینٹرنس ٹسٹ (نیٹ ) کے تحت کامیاب ہونے والے کنڑیگا طلبا ان 650 سیٹوں کے حق دار ہوں گے۔ نیٹ امتحان کے تحت تمام سرکاری کالجوں میں 6؍ہزار میڈیکل سیٹیں دستیاب ہوں گی، جن میں سے پہلے ہی پندرہ فیصد سیٹیں چھوڑ کر باقی تمام سیٹیں ریاست کے طلبا کے لئے مخصوص ہیں۔ لیکن کرناٹکا ایگزامنیشن اتھارٹی نے کامیڈ کے کے تحت نجی کالجوں میں داخلہ لینے والے طلبا کے لئے 50 فیصد سیٹیں مقامی سطح پر مختص کی تھیں اور بیرون ریاست طلبا کے لئے 50 فیصد سیٹیں طے کی تھیں، تاہم کنڑا نواز تنظیموں اور دیگر انجمنوں کی طرف سے نمائندگی کے بعد مزید17 فیصد سیٹیں کنڑیگا طلبا کے حق میں دی گئی ہیں۔
گزشتہ سال سے انڈین میڈیکل کونسل کی طرف سے میڈیکل سیٹوں میں اضافے کے سبب یہ قدم اٹھایا گیا ہے۔ پچھلے دو سال کے دوران کرناٹکا ایگزامنیشن اتھارٹی کی مداخلت کے نتیجے میں 13سو افزود میڈیکل سیٹیں ملی ہیں۔
حال ہی میں کرناٹکا ایگزامنیشن اتھارٹی کے عہدیداروں کے ساتھ کنڑا ڈیولپمنٹ اتھارٹی نے ایک میٹنگ کی اور کہاتھاکہ بیرون ریاستی طلبا جتنی میڈیکل سیٹوں پر داخلہ لے رہے ہیں ریاست کے طلبا کو بھی اتنی ہی سیٹوں پر داخلے کا موقع فراہم کیا جائے ، اس مطالبے پر قدم اٹھاتے ہوئے کرناٹکا ایگزامنیشن اتھارٹی نے افزود سیٹوں میں زیادہ حصے داری کنڑیگاؤں کی یقینی بنائی ہے۔