کنیز فاطمہ گلبرگہ سے پہلی خاتون ایم ایل اے منتخب
گلبرگہ 15؍مئی (ایس او نیو) گلبرگہ ضلع کے 9اسمبلی حلقوں میں سے کانگریس نے 5اور بی جے پی نے 4 اسمبلی حلقوں میں کامیابیاں حاصل کی ہیں۔ حلقہ اسمبلی گلبرگہ شمال سے کانگریس کی امیدوار محترمہ کنیز فاطمہ نے بی جے پی کو شکست دے کر پہلی بار ایم ایل اے منتخب ہوئی ہیں۔ گلبرگہ شامل سے الحاج قمرالاسلام 6 مرتبہ ایم ایل اے رہے ہیں ان کے انتقال کے بعد اس حلقہ سے کانگریس نے ان کی اہلیہ کنیز فاطمہ کو امیدوار بنایا تھا ۔ حلقہ اسمبلی جیورگی سے سابق چیف منسٹر دھرم سنگھ کے فرزند ڈاکٹر اجئے سنگھ، حلقہ اسمبلی چیتا پور سے لوک سبھا میں کانگر یس پارلیمانی پارٹی کے لیڈر ملکارجن کھرگے کے فرزند پریانک کھرگے اور چنچولی ڈاکٹر اومیش جادھو نے دوسری مرتبہ کامیابی حاصل کی ہے جبکہ سیڑم اسمبلی حلقہ سے ڈاکٹر شرن پرکاش پاٹل انتخاب ہار گئے ہیں۔ الند، سیڑم ، گلبرگہ جنوب ، گلبرگہ دیہی اسمبلی حلقوں سے سے بی جے پی کے امیدوار منتخب ہوئے ہیں۔ النداسمبلی حلقہ میں بی جے پی کے سابق ایم ایل اے سبھاش گتہ دار نے کانگریس کے موجودہ ایم ایل اے بی آر پاٹل کو شکست دی جبکہ سیڑم اسمبلی حلقہ میں مسلسل تین مرتبہ کامیاب ہونے والے کانگریس کے ڈاکٹر شرن پرکاش پاٹل کو بی جے پی کے راجکمار پاٹل تیلکور نے شکست دے دی ۔ حلقہ اسمبلی گلبرگہ دیہی میں کانگریس امیدوار وجئے کمار فرزند جی رام کرشنا سابق وزیر کو بی جے پی کے بسواراج متی موڑو نے شکست دی۔ گلبرگہ جنوب میں بی جے پی کے دتاتر یا پاٹل ریور نے دوسری مرتبہ اپنی کامیابی برقرار رکھی ہے ۔ حلقہ اسمبلی افضل پور میں بی جے پی سے علحدہ ہو کر کانگریس میں شامل ہونے والے ایم وائی پاٹل نے مالکیہ گتہ دار کو شکست دی۔ مالکیہ گتہ دار نے کانگریس سے علحدگی اختیارکرتے ہوئے بی جے پی سے انتخاب لڑاتھا۔ گلبرگہ ضلع میں پچھلے اسمبلی انتخابات میں بی جے پی صرف گلبرگہ جنوب اسمبلی حلقہ سے منتخب ہوئی تھی لیکن 2018ء کے اسمبلی انتخابات میں بی جے پی نے 4 اسمبلی حلقوں سے کامیابی حاصل کی ہے۔
