کلبرگی میں بغیر ڈرائیور کے ٹرین کا انجن 13کیلو میٹر تک دوڑتا رہا۔بائک سے پیچھا کرکے روکا گیا
کلبرگی ،9؍نومبر (ایس او نیوز) کلبرگی کے واڈی ریلوے اسٹیشن پر ایک فلمی منظر اس وقت حقیقت میں بدل گیا جب ریلوے انجن بغیر ڈرائیور کے ہی چل پڑا اور ریلوے افسران موٹر بائک پر 13کیلو میٹر تک پیچھا کرنے کے بعد انجن کو روکنے میں کامیاب ہوئے۔
بتایا جاتا ہے کہ چینئی ممبئی میل گاڑی واڈی اسٹیشن پر جب پہنچی تو معمول کے مطابق اس کا الیکٹرک انجن بدل کر اس میں ڈیزل انجن جوڑنے کے بعد ڈرائیور نے الیکٹرک انجن کو ذرا دوری پر دوسرے ٹریک پر پارک کردیا اور ٹرین ممبئی کی طرف آگے نکل گئی۔ لیکن پارک کیے گئے انجن کے بریک ٹھیک طرح سے نہیں لگنے کی وجہ سے انجن اپنے آپ ہی ٹریک پر دوڑنے لگا۔اس صورتحال سے گھبرائے ہوئے ریلوے افسران نے فوراً اگلے اسٹیشن کو الرٹ دے دیا کہ اس ٹریک پر آنے والی ٹرینوں کے لئے سگنل بند کردیا جائے۔ پھر ریلوے ٹریک کے ساتھ ساتھ بنی ہوئی سڑک پر موٹر بائک پر اس انجن کا پیچھا کرنے لگے۔ 13کیلو میٹر کا فاصلہ طے ہونے کے بعدنالوار اسٹیشن کے قریب انجن کی رفتار دھیمی ہوتے ہی ریلوے پائلٹ اس پر سوار ہونے اوربریک لگانے میں کامیاب ہوگیا ۔ اس طرح کوئی بڑا حادثہ رونما ہونے سے پہلے انجن کو قابو میں کرلیا گیا ۔