ملک کے آئین کے تحفظ کیلئے جو کرنا ہوگا ،دریغ نہ کریں گے : کجریوال
نئی دہلی:16/دسمبر (ایس او نیوز/آئی این ایس انڈیا) کیا دہلی کی حکمران عام آدمی پارٹی لوک سبھا انتخابات 2019 میں کانگریس سے اتحاد کرے گی؟ پچھلے کچھ عرصے سے یہ بحث مسلسل چل رہی ہے کیونکہ یہ گمان کیا جارہا تھا کہ عام آدمی پارٹی اور کانگریس کا ووٹ بینک تقریبا ایک ہے ۔ایسے میں مودی اور بی جے پی کو شکست دینے کے لئے اگر دونوں ساتھ نہ ہوں گے تو امکان ہے کہ دونوں کو ہی نقصان ہو اور بی جے پی بازی پھر سے مار لے ۔ دہلی کے وزیر اعلی اور عام آدمی پارٹی کے قومی کنوینر اروند کجریوال سے ہفتہ کو اتحاد کے بارے میں براہ راست سوال پوچھا گیا تو انہوں نے کہا کہ ’’میرا اپنا یہ خیال ہے کہ نریندر مودی اور امت شاہ کی جو جوڑے کی ہے یہ اس ملک کے موجودہ اور مستقبل کے لئے انتہائی خطرناک ہے‘‘۔ اگر 2019 میں یہ دوبارہ آ جاتے ہیں تو اس ملک کے آئین کو بھی نہیں بخشیں گے ۔ آئین نہیں بچے گا، آئین میں تبدیلی ہوگی اور پھر کچھ نہیں بچے گا۔ ہر ملک کے ذمہ دار شہری کی یہ ذمہ داری ہے کہ جو بھی ضرورت پڑے ان دونوں کی جوڑی کو اس بار شکست دی جائے اور اس کو شکست دینے کے لئے ہم جو بھی قدم اٹھا سکتے ہیں اس سے گریز نہ کریں گے۔ اروند کجریوال کے بیان سے یہ صاف ہے کہ عام آدمی پارٹی اب کانگریس سے اتحاد کرنے کے لئے تیار نظر آرہی ہے جبکہ چار ماہ پہلے اگست مہینے میں جب ہریانہ کے روہتک میں کجریوال سے مہا گٹھ بندھن میں شامل ہونے کو لے کر سوال پوچھا گیا تھا تو انہوں نے اس سے صاف انکار کر دیا تھا۔ انہوں نے کہا تھا’’میری سیدھی سیاست عوام کی سیاست ہے، عوام کی ترقی کی سیاست ہے۔ عوام کے مفادات کی سیاست ہے۔ ہماری سیاست اتحاد کو سیاست نہیں۔ کجریوال کے 4 مہینے پہلے اور اب دیئے گئے بیان سے یہ صاف ہے کہ اب عام آدمی پارٹی اتحاد کے لئے تیار ہے۔ کانگریس کے ساتھ تعلقات میں آئی کھٹاس فی الحال دور ہو گئی ہے ۔ 30 نومبر 2018 کو دہلی کے پارلیمنٹ اسٹریٹ پر کسان تحریک کے دوران اروند کجریوال اور کانگریس صدر راہل گاندھی ایک پلیٹ فارم پر دکھائی دیئے تھے، یہی نہیں گزشتہ پیر کو اپوزیشن پارٹیوں کی ہوئی میٹنگ میں پہلی بار کجریوال شامل ہوئے تھے۔ اس کے ساتھ ہی تین ریاستوں میں پیر کو کانگریس کی حکومتیں حلف لینے جا رہی ہے، جس میں وزیر اعلی اروند کجریوال کو دعوت دی گئی ہے۔ دیکھنا ہوگا کہ کیا کانگریس حکومتوں کے حلف برداری کی تقریب میں کجریوال شریک ہوں گے ؟ اگرچہ عام آدمی پارٹی اور کانگریس کا اتحاد کس طرح ہو گا؟ کتنی سیٹوں پر ہو گا ، اس کا سبھی کو انتظار رہے گا ۔