کاروار 11؍دسمبر (ایس او نیوز) کائیگا اٹامک پاوراسٹیشن(کے اے پی ایس)میں جوچار یونٹس بجلی تیار کررہے ہیں ان میں سے یونٹ نمبر1نے مسلسل 941 دنوں تک یورینیم کے بھاری پانی(ہیوی واٹر) سے بجلی تیار کرنے کا ورلڈ ریکارڈ بنایا ہے ، جس پر ملک کے وزیر اعظم نریندرمودی نے ہندوستان کے جوہری توانائی پروگرام پر کام کررہے سائنسدانوں اور عملے کی ستائش کرتے ہوئے انہیں مبارکباد پیش کی ہے۔

خیال رہے کہ بغیر کسی رکاوٹ کے ساتھ مسلسل 940دنوں تک بجلی تیار کرنے کا ورلڈ ریکارڈ یونائٹیڈ کنگ ڈم کے ہیشیم پلانٹ کو حاصل تھا۔ مودی نے اپنے ٹویٹ میں کہا ہے کہ یہ ہندوستانی سائنسدانوں اور انجینئروں کی انتھک محنت کا نتیجہ ہے جو ملک کو ترقی کی راہ پر مزید آگے لے گیا ہے۔

کاروار شہر سے 56کیلومیٹر دوری پر واقع کائیگا پلانٹ میں اس موقع پر گو یا جشن جیسا ماحول پید ا ہوگیا ۔نیوکلیئر پاور کارپوریشن آف انڈیا لمیٹیڈکے افسران نے بتایا کہ KAPS کے یونٹ نمبر 1کی عمدہ کارکردگی نے ملک کا سرفخر سے بلندکردیا ہے۔ اس یونٹ کے تحت اب تک 5بلین یونٹ بجلی تیار کی گئی ہے۔ اس سے ظاہر ہوتا ہے کہ جوہری توانائی کی تیاری میں ہمارے پاس بڑی صلاحیت اور قابلیت موجود ہے۔ 

خیال رہے کہ کائیگاپلانٹ سال2000میں قائم کیا گیا تھا۔ یہاں پر چار یونٹس جوہری توانائی تیارکرنے میں مصروف ہیں۔ہر یونٹ میں 220 میگاوہاٹ بجلی تیارکی جاتی ہے ۔اس پلانٹ کو ہندوستان میں ہی تیار کیا گیا ہے او راس کی تمام تر دیکھ ریکھ ہندوستانی ماہرین ہی کے ذریعے کی جارہی ہے۔ پلانٹ کے یونٹ نمبر1میں بھاری جوہری پانی سے بغیر کسی رکاوٹ کے مسلسل بجلی کی تیاری کا عمل 13مئی 2016کو شروع ہواتھااوراس یونٹ نے 10دسمبر 2018 کو دنیا کے تمام ریکارڈ توڑ تے ہوئے اپنا نام سر فہرست کردیا ۔یہاں تیار ہونے والی بجلی کرناٹکا کے علاوہ آندھرا پردیش اورتلنگانہ کو بھی فراہم کی جاتی ہے۔ 30 دسمبر کو یہ یونٹ مرمت اور دیکھ ریکھ کے لئے بند کردیا جائے گا۔