نئی دہلی،20 فروری(ایس او نیوز؍آئی این ایس انڈیا)قومی خواتین کمیشن نے سینئر صحافی برکھا دت کو ملی مبینہ دھمکی سے منسلک خبروں کا نوٹس لیتے ہوئے منگل کو دہلی پولیس سے کہا کہ وہ اس معاملے میں تیزی سے جانچ کرے اور قانون کے مطابق کارروائی کرے۔خواتین کمیشن کی صدر ریکھا شرما نے دہلی کے پولیس کمشنر انمول پٹنائک کو لکھے گئے خط میں کہاکہ میڈیا میں آئی خبروں سے خواتین کمیشن کو پتہ چلا ہے کہ صحافی برکھا دت کے پاس دھمکی بھرے فون آئے اور سوشل میڈیا میں انہیں پریشان کیا گیا کیونکہ انہوں نے ان کشمیری باشندوں کی مدد پیشکش کی جن کو نشانہ بنایا جا رہا تھا۔ انہوں نے کہاکہ یہ زور دیا جاتا ہے کہ معاملے میں تیزی سے تحقیقات کی جائیں اورقانون کے مطابق کارروائی کی جائے۔کمیشن کو ای میل یا فیکس کے ذریعے معاملے میں رائے بھی دی جائے۔